Keshe tańǵy 08.30-da Qaraǵandy oblysynda «ArselorMıttal Temirtaý» AQ Kómir departamentine qarasty «Abaı» shahtasynda kómir men gazdyń kenetten atylýy saldarynan oqıǵa bolǵan jerde alty kenshi kóz jumdy.
Apat kezinde jer astynda 64 kenshi bolǵan eken. VASS Kómir kúshteri qutqarý qyzmetkerleriniń jankeshti áreketiniń arqasynda 56 jumysshy jer ústine shyǵarylǵan. Eki kenshi aýyr jaǵdaıda Qaraǵandydaǵy H.Maqajanov atyndaǵy kópbeıindi aýrýhanaǵa jetkizildi. Gazdan qatty ýlanǵan olardyń ómirin aman saqtap qalý úshin dárigerler qoldan kelgen kómektiń bárin jasaýda.
Qaraǵandy oblysynyń ákimi Jeńis Qasymbek qaza bolǵan kenshilerdiń týystary men jaqyndaryna kóńil aıtty. Jáne óńir basshysy olardyń otbasylaryna qajetti kómektiń kórsetiletinin málimdedi. Sondaı-aq Jeńis Qasymbek sol kúni «Abaı» shahtasyndaǵy qaıǵyly oqıǵa boıynsha keńes ótkizdi. Jıynda «ArselorMıttal Temirtaý» AQ Kómir departamentiniń dırektory Andreı Chernomaz jáne basqa da jaýapty qyzmetkerler apatty oqıǵanyń barysy týraly baıandady. Oqıǵa boıynsha quramyna kompanııa men memlekettik organdar ókilderi engen jedel shtab quryldy. Oblystyń jáne kompanııanyń basshylyǵy qaza bolǵan kenshilerdiń úıine baryp, kóńil aıtty.
Sondaı-aq Premer-Mınıstr Asqar Mamınniń tapsyrmasy boıynsha memlekettik komıssııa quryldy. Tótenshe jaǵdaı mınıstri Iýrıı Ilın jetekshilik etetin bul komıssııa apattyń sebep-saldaryn anyqtaıdy. «Abaı» shahtasynda bolǵan kómir men gazdyń kenetten atylý oqıǵasyna baılanysty Qylmystyq kodekstiń 277-babynyń 3-tarmaǵyna sáıkes sotqa deıingi tergeý bastaldy.
Qaraǵandy oblysy