Almatynyń «Qaıraty» osydan birer apta buryn fýtboldan ÝEFA Konferensııa lıgasynyń toptyq kezeńdegi kezekti týr oıynyn túzde Ázerbaıjannyń «Qarabah» ujymymen ótkizip, Almatyǵa abyroısyz oralǵan bolatyn. Degenmen ońtústik astanalyq klýb Bakýde ketken eseni Ortalyq stadıondaǵy oıynda qaıtaramyz dep ózderin de, jankúıerlerin de sendirip edi. Biraq «Qaırattan» qaırat kete bastaǵan ba, áıteýir elimizdiń chempıony byltyrǵy «Qarabahtan» taǵy da jeńilip, jankúıerlerin jerge qaratty.
Árıne, «Qarabah» álsiz, «Qaırat» myqty deýden aýlaqpyz. Dese de keshegi oıynda ázerbaıjandyq klýbqa qaraǵanda «Qaıratta» jeńiske degen motıvasııa joǵary bolýy tıis edi. Syrt alańdaǵy jeńilistiń esesin qaıtarýdy aıtpaǵannyń ózinde, «Qaırat» fýtbolshylary kezdesýdi óz alańynda, óz jankúıerleriniń qoldaýymen ótkizdi. Sonymen qatar jeńiske jetip, úsh upaıdy oljalaıtyn bolsa, tuńǵysh ret Eýrokýbok oıyndarynyń toptyq kezeńine qatysyp jatqan almatylyq klýb pleı-off kezeńine shyǵý múmkindigin de saqtap qalatyn edi. О́kinishke qaraı, jeńis bylaı tursyn, jerlesterimiz teń oıynǵa da qol jetkize almady.
Qurban Berdyev shákirtteriniń kúshi tek alǵashqy 45 mınýtqa ǵana jetti. Tóreshiniń ysqyryǵy estile sala, «Qaırat» fýtbolshylary alǵa qaraı umtylyp, «Qarabah» qaqpashysynyń ábden mazasyn qashyrdy. Sát saıyn Hose Kante, Neboısha Kosovıch, Vagner Lav qaýipti shabýyl uıymdastyryp, gol soǵýǵa tyrysty. Biraq olardyń tepken doby keıde qaqpa baǵanyna tıip, keıbir sátterde qaqpashy keremet seıvimen kózge tústi. Osylaısha oıynnyń birinshi taımy «Qaırattyń» basymdyǵymen ótti.
Úzilisten keıin «Qarabahtyń» oıyny túrlenip shyǵa keldi. Birinshi taımdaǵy «Qarabahqa» uqsamaıdy. Qorǵanysta saq oınap, sáti kelgende qarymta shabýyldan gol soǵýǵa tyrysty. Ýaqyt ótken saıyn qonaqtar oıyn tizginin óz qoldaryna ala bastady. Nátıjesinde, kezdesýdiń 58-mınýtynda Ibraıma Vajdı «Qaırattyń» qorǵanystaǵy qateliginen keıin Stas Pokatılovpen jeke-dara shyǵyp, matchtyń esebin ashty.
Arada 10 mınýt ótkende «Qaırattyń» osy maýsymdaǵy eń úzdik shabýylshylarynyń biri Hose Kante tarazy basyn teńestirip, Ortalyq stadıonǵa jınalǵan jankúıerlerin shattyqqa bóledi. Goldan keıin «Qaırat» taǵy da basymdyǵyn arttyryp, qarsylastarynan jeńisti julyp alatynyna senimdi bolǵanbyz. Alaıda 72-mınýtta Abdella Zýbır taǵy da bir-birine senip qalǵan eki qorǵaýshymyzdy qapy qaldyryp, dopty qaqpadan alystap ketken Pokatılovtyń ústinen asyra saldy. Gol! «Qarabahtyń» ekinshi goly «Qaırat» jankúıerleriniń qýanyshyn sý sepkendeı basty. Matchtyń sońyna deıin almatylyqtar tarazy basyn teńestirýge qansha tyrysqanymen, qonaqtar bizdiń jigitterge múmkindik bermedi. Qorytyndy esep – 1:2. Sóıtip «Qaırat» jaýapty kezdesýde de «Qarabahtan» jeńilip qaldy.
Osylaısha, toptyq kezeńniń úsh oıynynda jeńilip, bireýinde teń túsken Qurban Berdyev shákirtteri toptan shyǵý múmkindiginen aıyryldy. Al úsh matchta jeńiske jetip, bir márte teń oınaǵan ázerbaıjandyq klýb 10 upaımen óz tarıhynda alǵash ret Eýrokýbok oıyndarynyń pleı-off kezeńine joldama aldy.
Matchtan keıin «Qaırat» klýbynyń bas bapkeri Qurban Berdyev match týraly pikirin ortaǵa saldy. «О́te qıyn oıyn boldy. Nysanaǵa baǵyttalǵan dál eki soqqy – ekeýi de gol boldy. Oıynymyzdyń sapasyna kóńilimiz tolady, biraq nátıje kóńilden shyqpady. Biz eki qarsy shabýyldy júzege asyra almadyq. Men jigitterge bul biz birge jumys istegen eń jaqsy oıyn ekenin aıttym», dedi Q.Berdyev.
Aıta keteıik, «Qaırat» Konferensııa lıgasyndaǵy kelesi oıynyn 25 qarashada óz alańynda Shveısarııanyń «Bazelimen» ótkizse, ekinshi matchta «Karabah» Bakýde Kıprdiń «Omonııasyn» qabyldaıdy. Al 10 jeltoqsanǵa josparlanǵan toptyq kezeńdegi sońǵy matchta jerlesterimiz Kıprge qonaqqa barady.