Parlament

«Egemen Qazaqstannyń» arnaýly beti

El úshin eńbek etý  –  paryzymyz

– deıdi Parlament Senatynyń depýtaty S.Jalmaǵambetova

Jýyrda Parlament depýtattary aımaqtarǵa baryp, saılaýshylarmen kezdesip, Elbasy N.Nazarbaevtyń «Qazaqstan joly – 2050: bir maqsat, bir múdde, bir bolashaq» atty jańa Joldaýyn jáne odan týatyn mindetterdi túsindirip keldi. Biz solardyń biri, belsendi senator Svetlana Jalmaǵambetovany áńgimege tartqan edik.

– Men Aqmola oblysynan saı­lanǵan depýtat retinde osy óńirde bolyp, 10 kezdesý ót­kiz­dim. Sonyń ishinde Jarqaıyń, Se­lı­nograd, Astrahan, Atbasar, Sandyqtaý, Shortandy jáne Esil aýdandarynda boldym. Sonymen qatar, Kókshetaý jáne Stepnogor qalalaryndaǵy saılaýshylarmen kezdestim. Kezdesýlerge halyqty arnaıy shaqyryp jınaǵan joqpyn, tek «Nur Otan» partııasynyń forýmdary men ákimderdiń esep berý jınalystaryna kelgen halyqpen kezdestim. Osy forýmdarda saılaýshylarǵa Prezıdenttiń jańa Joldaýynda alǵa qoıylǵan mindetter, Parlamenttegi istelgen jumystar týraly aıtyp jáne depýtat retinde halyqtyń ózime júktegen máseleleriniń sheshilý barysy týraly esep berdim.

Búgingi kúni Aqmola oblysyn­da respýblıkalyq bıýdjetten bó­lingen qarajatqa iske asyp jat­qan sharýa kóp. Sonyń ishin­de Úkimet bekitken «Shýche-Bý­ra­baı aımaǵyn damytý týraly» baǵdarlama bar. Oǵan 2014 jyl­dyń bıýdjetinen 19 mlrd. teńge qarajat bólý qarastyrylǵan. Astananyń tóńiregindegi aýyldardy damytý baǵdarlamasy bıyl aıaqtalady. Ol jumystarǵa bıyl 10 mlrd. teńge qarajat bólindi. Bul qarajat negizinen elektr qýatyn jetkizýge, aýyzsý máselesin sheshýge jumsalmaqshy. Osynyń ishinde Aqmoldan Qaraótkelge deıingi sý qubyryn tartý, sonymen qatar, Bozaıǵyrdaǵy sý qubyryn jańartý men Jibek jolyna sý tartý sııaqty naqty úsh aýylǵa bólingen qarajat meniń usynysymmen qosyldy. Al Maksımovkaǵa elektr qýatyn tartý úshin meniń usynysymmen bólingen qarajat artynan úsh aýylǵa bólip jiberildi. Stepnogor qalasyn ońal­týǵa monoqalalardy qoldaý baǵdar­lamasy boıynsha 4 mlrd. teńgedeı qarajat bólingen. Sonyń ishindegi eń ózekti másele – aýyzsý. Bıyl osy másele sheshiletin shyǵar. Al joldaryn jóndeýge 626 mln. teńge bólindi. Aımaqtardy damytý baǵdarlamasy boıynsha Kókshetaý qalasyna 4,7 mlrd. teńge qarastyryldy. Árıne, bulardan basqa baǵdarlamalar boıynsha Aqmola óńirine bıyl qomaqty qarajat bólingen. Solardyń ishin­de kópten beri kótersek te she­shil­meı kele jatqan bir másele bıyl óziniń sheshimin tapty. Ol – Jar­qa­ıyń aýdanynyń ortalyǵyna aýrý­hana salý. Buryn 140 oryndyq aý­rý­hananyń qujattaryn ótkizip, qarajat suralǵanda «aýdandarǵa mundaı úlken em oryndary salynbaıdy» dep kesip tastalǵan bolatyn. Biraq bul máseleni men aıaqsyz tastaýǵa úzildi-kesildi qar­sy bolyp, Úkimettiń aldyna shyǵarǵan soń, áıteýir qosymsha aq­sha bólinip, 70 oryndyq aýrýhana men emhana salýǵa qarajat bólindi. So­ny­men birge, bizdiń suraýymyz bo­ıyn­sha qosymsha qarajat bóliný ar­qyly Bulandy aýdanynda 420 oryndyq mektep salynatyn boldy. Sondaı-aq, Jarqaıyń, Shortandy, Astrahan jáne t.b. aýdandarda aýyz­sý máselesiniń sheshilýine tikeleı atsalystyq.

– Saılanǵan aımaǵyńyzdyń kóp máselesin sheshýge atsalysqan ekensiz. Saılaýshylar taǵy da qandaı máselelerdiń sheshilýine kómekteskenińizdi qalaıdy?

– El úshin eńbek etý – kim-kim úshin de azamattyq paryz. Al sura­ǵyńyzǵa kelsek, saılaýshylar taǵy da kóptegen máseleniń sheshilýine muryndyq bolýymdy ótindi. Sonyń ishinde Esil aýdanynyń ortalyǵy Dvýrechen aýylyna aýyzsý jetkizý máselesin sheshýdi surady. Mundaǵy sý qubyrlary kúrdeli jóndeýdi ǵa­na talap etkendikten, «Aq bulaq» baǵ­darlamasyna engizilmeı, «Ju­mys­pen qamtý» baǵdarlamasy boıynsha qarastyrylǵan. Alaıda, qajetti qarajat úlken bolǵandyqtan, oǵan da engizilmegen edi. Endi osy máselemen aınalysatyn bolamyn. Sondaı-aq, Zerendi aýdanyndaǵy Bereznıkovka, Sandyqtaý aýdanyndaǵy Kamenka, Eńbekshilder aýdanyndaǵy Mamaı jáne t.b. eldi mekenderge aýyzsý tartý máselelerin sheshýge atsalysýym kerek. Aımaqtaǵy qalalar men aýyldardyń únemi sheshilmeı jatqan bir máselesi – jol. Sonyń ishinde Kókshetaý, Shýche qalalarynyń joldary syn kótermeıdi. Byltyr bul jumystarǵa qyrýar qarajat bólingen edi, al bıyl aǵymdaǵy orta jáne shaǵyn jóndeýlerdiń shyǵynyn jergilikti bıýdjetke syryp tastap, olar qarajat taba almaı otyr. Endi osy máselege Úkimet nazaryn aýdartýym kerek.

Kóptegen eldi mekenderde jylý qubyryn tartý máselesin sheshýge qol jetkizdik. Bul jumystar qazir Aqmolda, Bulandy aýdanynyń or­ta­lyǵynda júrgizilýde, bıyl Bý­rabaıda bastalady. Endi Atbasarǵa da sondaı jumystar qajet. Onda jańa shaǵyn aýdan salynýda, soǵan endi bý qazandyǵy qajet bolyp tur, Úkimetten soǵan qarajat bó­linýin ótinýim kerek. Sondaı-aq, Astananyń tóńiregin damytý baǵdarlamasy bıyl aıaqtalýyna qaramaı áli de kóptegen eldi mekenderde elektr qýatyn, aýyzsý tartý tolyq sheshilgen joq. Sonyń sheshilýine atsalysýym da suraldy. Qazir Úkimet 2020 jylǵa deıingi merzimge damý baǵdarlamasyn jasap jatyr. Osy baǵdarlamaǵa atalǵan máselelerdiń kirýin qadaǵalaýym kerek. Aýyl­dardaǵy tolyq komplektili emes mektepterdiń qamtylýy nashar. Solardyń máselesin sheshýde jer­gilikti halyqtyń usynys-pikirlerin eskerý kerek.

Men birshama jergilikti mamandar men janashyr adamdardyń usynystaryn bilip keldim, endi solardy qorytyndylap, osy máse­leni sheshý boıynsha Úkimetke depýtattyq saýal joldamaqpyn. Elbasy bilimniń sapasy joǵary bolýyn talap etip otyrǵan jaǵdaıda Bilim jáne ǵylym mınıstrliginiń usynǵan dıstansııalyq jáne resýrstyq ortalyq arqyly oqytý sııaqty ádis-tásilderiniń tıimdiligi joǵary bola qoıar degenge sený qıyn. Bizdińshe, bul máseleni osy zamanǵy barlyq jabdyqtarmen jaraqtalǵan ınternattar salý arqyly sheshken durys.

– Halyqtyń áleýmettik qamtylýy máselesi boıynsha da suraqtar bolǵan shyǵar?

– Ondaı máseleler de bar­shy­lyq. Máselen, úlken daǵdarys jyl­dary zeınet demalysyna shyq­qandardyń zeınetaqysy tómen. Sondaı jandar ózderiniń zeınet­aqysy qaıta qaralsa eken degen tilek bildirdi. Sondaı-aq, teńge ba­ǵa­myna túzetýler engizilýine oraı Úki­mettiń ustanǵan pozısııa­syn ha­lyqqa jetkizip, munyń qa­jetti shara bolǵandyǵyn túsin­dirdik. Halyq arasynda posh­ta bólimderiniń ja­bylýyna da narazylyq bar. Mı­nıstrlik halqy 2 myńnan az aýyldarda poshta bólimderin jaýyp jatyr. Jyljymaly poshta bólimsheleri degen jasalady deıdi, biraq onyń tıimdi bolmaǵyna halyq alańdaýly. Bul máseleni men de kópten kóterip júrmin. Soltústik oblystardyń qaı aýylyn alsaq ta turǵyndary 2 myńǵa jetpeıdi. Sondyqtan bul aımaqqa erekshe baǵdarlama jasaýdy usynǵan bolatynmyn. Bul másele qaralý ústinde.

– Halyqtyń bıylǵy Jol­daýǵa degen kózqarasy qalaı?

– Halyq Joldaýdy qoldap otyr, ásirese, áleýmettik salaǵa qam­qorlyq jasaý maqsatymen eńbekaqylarynyń kóteriletinine rıza. Sonyń ishinde múgedekterdi qoldaý jónindegi tapsyrmaǵa razylyqtaryn bildirgen adamdar kóp boldy. Olardy jumyspen qamtamasyz etý máselesiniń qaras­tyrylǵany da rızashylyq týdyrýda.

– Áńgimeńizge rahmet.

 Áńgimelesken

Jaqsybaı SAMRAT,

«Egemen Qazaqstan».

Halqymyzdyń sapalyq kórsetkishin tómendetpeıik

Senat depýtaty Qýanysh Aıtahanov Premer-Mınıstr Serik Ahmetovtiń atyna depýtattyq saýal joldady. Ol «Aýyldyq mektepterde bilim berý sapasyn jaqsartý týraly» dep atalady.

Al saýalda bylaı delinedi:

«Qurmetti Serik Nyǵmetuly!

Ústimizdegi jylǵy Elbasymyz N.Á.Na­zar­baevtyń Qazaqstan halqyna Joldaýynda Ulttyq bilim berýdiń sapasyn jaqsartýda aýqymdy jumystar júrgizý qajettiligi aıtylyp, bilim salasyn damytýǵa baılanysty naqty mindetter qoıyldy. Elbasy qoıǵan mindetterdi oryndaý, ásirese, aýyldyq jerlerdegi bilim berý sapasyna erekshe kóńil bólýdi kerek etedi. О́ıtkeni, elimizdegi 7402 jalpy bilim beretin mekteptiń 5 776-sy nemese 78 paıyzy aýyldyq eldi mekenderde ornalasqan. Bul mektepterde Otanymyzdaǵy oqýshylardyń 1 237 myńy nemese 51 paıyzy bilim alýda.

Búgingi tańda, aýyl mektepterinde sheshimin tappaǵan máseleler jetkilikti. Birinshiden, olardyń materıaldyq-tehnıkalyq bazasy nashar. Arnaıy jabdyqtalǵan pándik kabınetter, zerthanalar joq. Kórneki quraldar eskirgen. Kitap qory az. Shet tilderin oqytý deńgeıi tómen. Aýyl mektepteriniń 70 paıyzdan astamy shaǵyn jınaqtalǵan mektepter. Onyń ústine muǵalimder jalaqylarynyń azdyǵynan, áleýmettik qorǵaý, moraldyq jáne materıaldyq yntalandyrý sharalarynyń tolyq sheshilmeýinen aýyldyq jerlerde joǵary kásibı bilikti muǵalimder tapshy. Bul jaǵdaı, ustaz kadrlarynyń qartaıýyna, bir pánniń muǵalimi birneshe pánnen sabaq berýine ákelip soqtyrýda.

Aýyl mektepteri oqýshylarynyń fızıkalyq, ıntellektýaldyq jáne shyǵarmashylyq damýyna tıisti jaǵdaılar jasalmaǵan. Elimizdegi sport zaldary joq mektepterdiń 82%-y (1620 mektep) aýyldarda. Mektepten tys uıymdarmen aýyl oqýshylarynyń 6,8%-y ǵana qamtylǵan. Aýyl mektepterin aqparattyq tehnologııalarmen qamtý da óz deńgeıinde emes. Búginde keń jolaqty ınternetpen qala mektepteriniń 67,2 paıyzy, al e-learning baǵdarlamasymen 32,4 paıyzy qamtylǵan bolsa, aýyl mektepterinde bul úrdis áli bastalmaǵan.

Aýyl mektepterin bitirýshiler joǵary oqý oryndaryna túsý kezinde memlekettik grantty jeńip alýda básekege qabiletsiz bolyp otyr. Mysaly, 2012 jáne 2013 jyldardaǵy Ulttyq biryńǵaı testileýdiń qorytyndylary boıynsha aýyldyq mektep túlekteriniń 21,5 paıyzy eń tómengi shekti balldy jınaı almady. Jalpy, UBT-nyń joǵary ballyn (70-125 ball aralyǵy) jınaǵandardyń ishinde aýyldyq mektep túlekteriniń úlesi nebári 29 paıyzdy quraıdy. Aýyl mektebin bitirýshilerdiń UBT-nyń ortasha bally qalalyq mektep túlekterinen 8,7 ballǵa tómen. Onyń saldarynan aýyldyq mektep túlekteri joǵary oqý oryndaryna memlekettik grant esebinen túse almaı, aqyly oqý oryndaryna barýǵa májbúr bolýda. Al aqyly oqýdy kez kelgen aýyl balasynyń qaltasy kótere bermeıdi. Bul orta bilimdi ǵana qanaǵat etken, bilimsiz, jumyssyz jastardyń kóbeıýine, halqymyzdyń sapalyq kórsetkishiniń tómendeýine ákelýi múmkin.

Aýyldyq jerlerde balalardy mektepke deıingi bilimmen qamtý máselesi de sheshimin tappaı keledi. Búginde aýyldyq jerlerde balabaqsha jasyndaǵy (3-6 jas) búldirshinder sany 344 820-ǵa jetti. Al olardy balabaqshamen qamtý 64%-dy quraıdy. Bul balabaqshalarǵa degen qajettilik 121 220 orynǵa tapshy degen sóz. Jáne osy jaıt 300 oryndyq 404 balabaqsha salý kerek degendi bildiredi. Alaıda, 2014 jylǵy respýblıkalyq bıýdjette elimizde jańa balabaqsha salýǵa qarjy múldem qarastyrylmaǵan.

Sondyqtan, qurmetti Serik Nyǵmetuly, Elbasymyz N.Á.Nazarbaevtyń bıylǵy Joldaýynda qoıylyp otyrǵan mindetterdi tııanaqty oryndaý jáne elimizde bilimdi, bilikti, básekege qabiletti mamandar daıarlaý maqsatynda aýyldyq jerlerde mektepter men balabaqshalar salýǵa qajetti kólemde qarjy bólý, olardyń materıaldyq-tehnıkalyq bazasyn nyǵaıtý, aýyldyq ustazdardyń bilimi men jalaqysyn kóterý, aýdan ortalyqtarynan «Daryn» mektepterin ashý jáne basqa da aýyl mektepteriniń bilim sapasyn arttyrý baǵytyndaǵy qordalanyp qalǵan máselelerdi arnaıy qarap, oń sheshilýine yqpal etýińizdi suraımyn».

Kóterilgen másele óte mańyzdy

nemese «Egemen Qazaqstanda» jarııalanǵan depýtat saýalyna oraı

«Sizdi ne tolǵandyrady?» aıdarymen Egemen Qazaqstan gazetinde 2014 jyly 11 qańtarda Májilis depýtaty Álıhan Toıbaevtyń «О́mir­de boıǵa jıǵannyń bári kerek» atty maqa­lasyn oqyǵannan keıin qolyma qalam alǵandy jón kórdim.

Men de Á.Toıbaevtyń zaman­da­sy bolýym kerek, Qyzyl­or­da­da 1965 jyly 11-synypty bi­ti­rdim, bizdiń mektep-ınterna­tymyzda 9-11 synyptardy oqyǵan kezimizde 3 jyl boıy «tas qalaýshy» (kamenshık) mamandyǵyn ár aptanyń tolyq bir kúninde oqytty jáne mamyr-maýsym aılarynda qurylys obektilerinde taǵylymdamadan ótip áp-ájeptáýir praktıka aldyq jáne mektep bitirgende 3 razrıadty tas qalaýshy degen kýálik ıelendik.

Osy qosymsha alǵan maman­dyǵym ınstıtýtta oqyp júr­gende jaz aılarynda, 1966-1967 jyldary Pavlodar, Sol­­tústik Qazaqstan oblys­taryna stýdenttik-qurylys otrıad­tarynyń quramynda sov­hozdarda turǵyn úı, qora-qopsy, áleýmettik-mádenı obektilerin salǵanda qajetke jarady, bir­shama aqsha qarajatyn tap­tyq. Bizdiń mektebimizdegi bas­qa sy­nyp­­ta­ǵy­lar tas qalaý­­shy­men qatar, sy­laqshy ma­man­dyq­taryna qo­symsha oqyp, tıisti kýálikterin aldy. Birqatar mektep bitirýshiler sol mektepten alǵan jumysshy mamandyqtaryn keıingi ómir joldarynda kásip etti.

Osyndaı bizdiń kóz aldy­myz­da bolǵan jumysshy kadr­lardy daıyndaýdyń ómir­sheń, ozyq praktıkasyn qazir de jalǵastyrsaq, mektepten keıin kásibı mektepterde (kol­ledjderde) oqý úshin 1-2 jyl ýaqytty jáne bıýdjettiń qar­jy­syn shyǵyndamaı únemdep, jumysshy mamandardy mektepte daıarlaýdy ońtaılandyrǵan utymdy bolmaq.

Sonymen qatar, qazirgi tańda kóptegen arnaýly orta jáne joǵa­ry bilimdi jas mamandardy oqý bitirgen soń «Jastar praktıka­sy» degen baǵdarlamamen qaıtadan 6 aı boıy bıýdjetten arnaıy qarjy bólip, mekemeler men kásiporyndarda taǵylymdamadan ótkizý júrgizilýde. Keńes Odaǵy tusynda orta jáne joǵary bilim alǵandarǵa jumysqa ornalasqan soń 10 aı merzimge tájirıbeli qyzmetkerlerden tálimger bekitilip, qyzmettiń oı-shuqyrlary úıretilip, merzim aıaqtalǵan soń tálimgerdiń jas mamannyń taǵylymdamasynyń qorytyndysy týraly esebine sáıkes, ári qaraı mamandy qan­daı qyzmetke paıdalanýǵa bola­ty­ndyǵy týraly qorytyndy jasalatyn. Osyndaı jumyc or­nyn­da taǵylymdamadan ótýge qo­symsha eshqandaı da qarjy kerek etilmeıtin, sondyqtan da buryn jaqsy nátıje bergen jumystardy nege jańǵyrtpasqa.

Osynyń alǵysharty retin­de orta jáne joǵary oqý oryn­darynyń 2-3-4 kýrstaryn bitirgen soń, óndiristik praktıkany ótkizý máselesinde de oılanatyn tustar joq emes. О́tken ǵasyrdyń 70-90-jyldaryndaǵy stýdentter úshin óndiristik praktıkanyń bazasy aldyn ala mınıstrlikter men JOO arqyly anyqtalyp, praktıkanttardyń naqty praktıkany qalaı ótkizip jatqanyn tekserýge jáne ádistemelik kómek berýge oqý ornynan bólingen oqytýshy birneshe ret barýshy edi. Qazirgi ýaqytta oqý oryndary stýdentteriniń óńdiristik praktıkasyn ótkizý úshin bazalyq mekemeler men kásiporyndardy belgileýde kemshilikter kóp sekildi nemese stýdenttiń óziniń nemese ata-anasynyń praktıka ótetin jerdi óz betterinshe izdestiryin qalaı túsinýge bolady? Kóp jaǵdaıda «praktıka ótti dep joldamaǵa belgi soǵyp berseńizder bolady» dep kelisimpazdyqqa ıtermeleýi, óndiristik praktıkany qalaı ótip jatyr dep oqý oryndary ókilderiniń óz stýdentteriniń artynan iz salmaýy da oılandyrmaı qoımaıdy.

Bolashaq kadrlardy taǵy­lymdamadan ótkizýdegi jiberilip júrgen osyndaı kemshilikter saldarynan oqý ornyn bitirýshiler jumys oryndaryna kelgennen bastap tapsyrylǵan jumysty birden atqara almaıdy. Osy keleńsizdikti joıý úshin «jas­tar taǵylymdamasy» engizilip, bıýdjet qarjysynyń orynsyz jumsalýyna tosqaýyl qoıý qajet. Osyny oılanatyn ýaqyttyń jetkeni kúmánsiz.

Qambar ÁJIBEKOV,

Qazaqstannyń eńbek sińirgen qaıratkeri.

Qyzylorda oblysy.

Standarttar – minsiz qyzmet kórsetý tetigi

Parlament Májilisindegi «Nur Otan» partııasy fraksııasynyń Áleýmettik keńesi palatanyń Áleýmettik-mádenı damý komıtetimen birlesip otyrys ótkizdi. Onda áleýmettik qyzmet kórsetý standarttary jáne áleýmettik ortany damytý faktory jan-jaqty sóz boldy.

Otyrysta moderatorlyq jasaǵan fraksııanyń Áleýmettik keńesiniń tór­aıymy Aıtkúl Samaqova óz sózinde bıylǵy Joldaýda Elbasy áleýmettik standarttarǵa qatysty naqty tapsyrmalar bergendigine erekshe toqtaldy. Al Májilis depýtaty Svetlana Ferho «Áleýmettik qyzmetti standarttaý – áleýmettik salany damytý faktory» degen taqyrypta baıandama jasady. Depýtattyń aıtýynsha, elimizde áleýmettik zańnamalyq baza qurylǵanymen, onyń áleýeti áli de tolyq paıdalanylmaı keledi. Ásirese, qabyldanǵan normatıvtik quqyqtyq aktilerdiń oryndalýyna baqylaý qajetti deńgeıde emes. Sondyqtan da áleýmettik zańnamanyń tıimdiligine zertteý júrgizilýi oryndy bolmaq. Munyń barlyǵy da depýtattar bastamashy bolǵan «Mınımaldy áleýmettik standarttar jáne kepildikter týraly» jáne oǵan ilespe zań jobalarynda kórinis tabýy tıis.

Medısınalyq qyzmet kórsetý standarttary júıelengenin tilge tıek etken densaýlyq saqtaý vıse-mınıstri Erik Baıjúnisov bul standarttar pasıenttiń úıinen aýrýhanaǵa jetýindegi jaǵdaıyn tolyq qamtıtyndyǵyn ortaǵa saldy.

Onkologııalyq aýrýlardy emdeýde fran­sııa­­lyq emdeý ortalyǵynyń standarttary bas­­shylyqqa alynatyny atap kórsetildi. Ishe­­tin sýdan bastap, sanıtarlyq avıasııaǵa deıin standarttalatyny belgili boldy. Tipti, jedel járdemniń ózi burynǵydaı jarty sa­ǵatta emes, Pavlodardaǵydaı 9 mınýtta, al Al­­­matydaǵy jaǵdaıda 11 mınýtta dittegen jeri­­ne jetýi tıis. Onda da jedel járdem kóli­gi medısınalyq qural-jabdyqtarmen to­lyq qamtamasyz etilýi tıis. Qujat aınaly­mynda jýrnaldar toltyrýdyń 40 paıyzy qys­qartylyp, qalǵany Elektrondy den­saý­lyq saqtaý júıesine engiziletini erekshe ataldy.

Memleket tarapynan jasalyp jatqan áleýmettik qoldaýlardy sanamalap bergen Eńbek jáne halyqty áleýmettik qorǵaý vıse-mınıstri Svetlana Jaqypova qazirgi tańda mınımaldy ómir súrý shegi men eń tómengi jalaqy kóleminiń birdeı ekendigine nazar aýdardy. Onyń sózine qaraǵanda, halyqaralyq sarapshylar osy eki kórsetkishti esepteý ádisin tolyq ózgertý qajettigin usynyp otyr. Áıtse de barlyǵy ekonomıkanyń deńgeıine jáne bıýdjettiń múmkindigine tirelip otyr. Sondaı-aq, vıse-mınıstr azyq-túlik sebetiniń qurylymyn da ózgertý qajettigin erekshe atady. Búgingi tańda azyq-túlik quramy 43 ónimnen turatyn kórinedi. Alaıda, turǵyndar qarajattyń 55 paıyzyn azyq-túlik emes zattarǵa jumsaýdy durys kóredi eken. Sondyqtan da bul saladaǵy standarttardy da qaıta qarastyrǵan jón.

Áleýmettik keńes otyrysynda budan basqa da baıandamashylardyń ýájderi tyńdaldy. Sondaı-aq, aıtylǵan máseleler boıynsha talqylaý júrdi. Artynan Múgedekterdi áleýmettik qorǵaý máseleleri boıynsha jasalǵan zańnamalyq aktilerdiń áleýmettik zertteýi men monıtorınginiń tusaýkeseri bolyp ótti.

Asqar TURAPBAIULY, «Egemen Qazaqstan».

Fotokúndelik

Sýretterdi túsirgen Orynbaı Balmurat.