Parlament Senatynyń Bıýro músheleri 2021 jylǵy 11 qarashaǵa josparlanǵan Palata otyrysynyń kún tártibin bekitti, dep habarlaıdy Egemen.kz.
Senat depýtattary kezekti otyrysta «Qazaqstan Respýblıkasy Joǵarǵy Sotynyń sýdıasy qyzmetine saılaý týraly» Qazaqstan Respýblıkasy Prezıdentiniń usynymdaryn qaraýdy josparlap otyr.
Sondaı-aq «2004 jylǵy 22 jeltoqsandaǵy Qazaqstan Respýblıkasynyń Úkimeti men Reseı Federasııasynyń Úkimeti arasyndaǵy «Baıqońyr» ǵarysh aılaǵynda «Báıterek» ǵarysh zymyran keshenin qurý týraly kelisimge ózgerister men tolyqtyrýlar engizý týraly hattamany ratıfıkasııalaý týraly» zań jobasy da talqylanatyn boldy.
Senattyń aldaǵy otyrysynyń kún tártibine «Qazaqstan Respýblıkasynyń keıbir zańnamalyq aktilerine memlekettik basqarý deńgeıleri arasynda ókilettikterdi qaıta bólý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda qaraýǵa engizildi. Zań jobasy memlekettik organdardyń derbestigin jáne tıisti jaýapkershiligin arttyrýǵa múmkindik beredi. Ol qabyldaǵannan keıin birqatar mınıstrlikterge qosymsha fýnksııalar beriletin bolady.
Bıýro músheleri sonymen qatar Májilisten buryn kelip túsken «Qazaqstan Respýblıkasy Táýelsizdiginiń otyz jyldyǵyna baılanysty raqymshylyq jasaý týraly» zań jobasyn Konstıtýsııalyq zańnama, sot júıesi jáne quqyq qorǵaý organdary komıtetine pysyqtaýǵa berdi.