Bul týraly elordalyq máslıhatta ótken turaqty komıssııanyń otyrysy barysynda Ekonomıka jáne bıýdjettik josparlaý basqarmasy basshysynyń orynbasary Almat Seıtqulov aıtty, dep jazady Egemen.kz.
Sondaı-aq ol atalǵan qurylys nysandary aıaqtalýy úshin qajetti qarajattyń bólingenin atap ótti.
«Jyldyń sońyna deıin úleskerlik qurylyspen salynyp jatqan 18 problemalyq nysandy aıaqtaý josparlanyp otyr. Ol úshin qajetti qarajattar bólingen. Osylaısha, 7,5 myń úlesker ózderiniń jańa baspanasynyń kiltin ıelenedi», dedi basqarma basshysynyń orynbasary.
Aıta keteıik, elordadaǵy problemalardy sheshý úshin arnaıy jol kartasy ázirlengen. Ol 107 tarmaqtan turatyn 13 negizgi baǵytty qamtıdy. Onyń oryndalýy úshin 2021-2025 jyldarǵa arnap 878,8 mlrd teńge qarastyrylǵan.