Orta salmaq dárejesinde IBF jáne IBO tujyrymdary boıynsha álem chempıony Gennadıı Golovkın meksıkalyq Saýl Alvarespen ekinshi ret judyryqtasqannan keıin aıtarlyqtaı aty bar boksshymen judyryqtasqan joq, dep habarlaıdy Egemen.kz.
Iá, ol aralyq salmaqta Stıv Rollspen qolǵap túıistirdi. Rollsty kásipqoı boks áleminde kúshi myǵym ári tanymal boksshy dep eshkim aıta almaıdy. Odan bólek Sergeı Derevıanchenkomen judyryqtasty. Bul shaıqas otandasymyz úshin óte qıyn jekpe-jek bolǵany anyq. Keıinnen Gena polshalyq Kamıl Sheremetany ońaı jeńdi. Qysqasy, qazaqstandyq boksshy sońǵy kezderi aıtarlyqtaı tanymal boksshylarmen kezdespedi.
Saýl Alvares she? Denıel Djeıkobsty, Sergeı Kovalevti, Kallým Smıtti, Avnı Iyldyrymdy, Bıllı Djo Sondersti jáne Kaleb Plantty utty. Salystyrmaly túrde aıtsaq, Golovkın osy aralyqta úsh jekpe jekke shyqsa, Alvares alty qarsylasynan aılasyn asyrdy. Gena tek laıyqty deýge keletin qarsylastardan Sergeı Derevıanchenkoǵa qarsy rıngke kóterilse, Alvares Bıllı Djo Sonders, Kaleb Plant, Kallým Smıt, Denıel Djeıkobs sekildi salystyrmaly túrde qarymdy qarsylastarmen qolǵap túıistirdi. Orta salmaqtan ketken soń ekinshi orta jáne jartylaı aýyr salmaqta álem chempıony ataǵyna qol jetkizdi.
Qysqasy, bul statıstıka Alvarestiń paıdasyna sóılep tur. Ol qazir naǵyz babynda. Jeltoqsanda japon jigiti Rıota Mýratany jarqyn mánerde jeńip, óziniń áleýeti zor ekenin kórsetpese, Golovkın Alvarespen úshinshi jekpe-jekke shyqqan kúnniń ózinde anyq aýtsaıder sanalady degen oıdamyz.