Keshe Ashat Daýylbaevtyń tóraǵalyǵymen Bas prokýratýranyń alqa májilisi ótti. Onda jetim balalardy jáne ata-anasynyń qamqorlyǵynsyz qalǵan balalardy asyrap alý, sonyń ishinde sheteldik azamattardyń asyrap alýynyń tártibi týraly zańnamalardyń saqtalýyna memlekettik ýákilettik organdardyń 2012-2013 jylǵy qyzmetine júrgizilgen tekserý qorytyndylary talqylandy.
Bas prokýror «Qazaqstan-2050» Strategııasynda Memleket basshysy árbir balanyń quqyǵyn qorǵaýdy, sondaı-aq jetimderdi asyrap alýdy qoldaýdy memleket pen qoǵamnyń mańyzdy mindetteri retinde belgilegenine toqtaldy.Sońǵy 15 jyl kóleminde respýblıkada 50 myńnan astam bala asyrap alynǵan, olardyń 41 myńnan astamyn qazaqstandyq otbasylar, 9 myńǵa jýyǵyn sheteldik azamattar asyrap alǵan. Sońǵy jyldary asyrap alý rásimine saýdanyń jáne qylmystyń aralasý úderisi, kámeletke jasy tolmaǵandardy satý faktileri baıqalyp otyr. О́tken jyly bala saýdasy faktileri boıynsha 25 qylmys anyqtalǵan. Keıingi eki jyl ishinde zańmen belgilengen tártipti aınalyp ótip, bala asyrap alýǵa esepte turmaǵan adamdar 457 balany asyrap alǵan. Áleýetti asyrap alýshylar resmı rásimderden ótpesten, balany tikeleı asyrap alýdy jón kórip, qasaqana zań buzýǵa barady.
Sonymen qatar, 1858 jetimdi ortalyqtandyrylǵan esepten alyp tastaǵan qamqorshylyq jáne qorǵanshylyq organdardyń laýazymdy tulǵalarynyń kinálarynan balalar asyrap alyný jáne otbasyna ıe bolý múmkindiginen aıyrylǵan. Al Qaraǵandy jáne Almaty oblystarynda balalardy narkologııalyq esepte turǵan, psıhıkalyq aýrýlary bar jáne ótelmegen sottylyǵy bar adamdarǵa asyrap alýǵa bergen shekten shyqqan jaǵdaılar anyqtaldy. Bala asyrap alǵan otbasylardaǵy, ásirese, shetelderdegi balalardyń ómir súrý jaǵdaıyn tıisti esepke alý jáne olarǵa baqylaý júrgizý qamtamasyz etilmegen. Jergilikti atqarýshy organdardyń jáne shetelderdegi mekemelerdiń tıisti baqylaýynyń bolmaýynan asyrap alýshylar 305 myń balanyń ómir súrý jaǵdaıy týraly esep bermegen, sheteldik azamattarǵa asyrap alýǵa berilgen 673 qazaqstandyq balanyń taǵdyry belgisiz kúıinde qalyp otyr. Osy maqsattarda eń aldymen asyrap alý rásimin zańnamalyq ońaılatý, balany eshbir artyq formalızm jáne sózbuıdasyz otbasyǵa anyqtaýǵa múmkindik beretin naqty jáne túbegeıli ólshemder tizilimin ázirleý týraly bastama kóterý usynyldy.
«Egemen-aqparat».