Qostanaı oblysynda tabıǵı ortadaǵy aýa men sýdy zerttep, onyń quramyndaǵy zııandy zattardyń mólsherin anyqtaý jumystary júrip jatyr. Ekolog mamandar, ásirese, «Qostanaı mıneraldary» AQ, «Toqtar» «MK», «Varvarınsk» AQ men «Brend» jáne «О́rken» jaýapkershiligi shekteýli seriktestikterine qarasty ken oryndarynyń mańaıyndaǵy ózen-kólderdiń lastaný deńgeıin anyqtaýǵa kóp kóńil bólip otyr.
Oblystyq ekologııa departamentiniń málimetinshe, Qostanaı, Arqalyq, Lısakov jáne Jitiqara qalalarynda ornalasqan iri kásiporyndardyń aınalasyndaǵy atmosferalyq aýanyń lastanýyn anyqtaý jyl boıy júrgiziledi. Mundaı monıtorıng jumystarynyń aıasynda Tobyl ózeni men onyń Aıat, Shortandy, Jelqýar, Obaǵan sııaqty salalaryndaǵy, sondaı-aq Joǵarǵy Tobyl, Qaratomar, Amangeldi sý qoımalaryndaǵy zııandy zattar mólsheri tekseriledi.
Taıaýda Lısakov qalasy men Beıimbet Maılın aýdanynda monıtorıng jumystary júrgizildi. Zerthanalyq-saraptamalyq baqylaý bólimine qarasty synama zerthanasynyń mamandary Lısakovtaǵy atmosferalyq aýa quramyn zerttep, qalanyń Tobyl, Promyshlennaıa, Gornıak, Joǵarǵy Tobyl kóshelerinde ornalasqan sý toraptaryndaǵy shań-tozań men azot dıoksıdi, kúkirt dıoksıdi, kómirtegi oksıdi sııaqty zııandy zattar mólsherin anyqtady. Al Beıimbet Maılın aýdanyndaǵy «Varvarınsk» kásipornynyń aýmaǵynda atmosferalyq aýa quramynda shoǵyrlanǵan sıanıd mólsherin anyqtaý jumystary júrgizildi. Mamandardyń aıtýynsha, monıtorıng qorytyndysy boıynsha, atmosferalyq aýadaǵy azot dıoksıdiniń shekti mólsherden shamaly ǵana asyp turǵany anyqtalǵan. Aýa quramynyń lastanýy avtokólikter men jylý kózderinen shyqqan kók tútinniń áserinen bolýy múmkin deıdi ekologter.
Taldaý jumystaryn qorytyndylaǵan mamandar «Varvarınsk» ken ornyn janaı aǵyp ótetin Aıat ózeniniń boıyndaǵy baqylaý núktelerinde, sondaı-aq kásiporynnyń óndiristik aýmaǵyna ornalasqan baqylaý uńǵymalarynda sıanıdtiń joq ekenin aıtyp otyr.
Ekologter oblysta tabıǵı ortanyń tazalyǵyn tekserý jumystary qarasha aýǵansha jalǵasatynyn jetkizdi.
Qostanaı oblysy