Shymkent qalasynyń ákimi Murat Áıtenovtiń búgin ótkizgen onlaın rejımdegi qoǵamdyq qabyldaýyna jazylǵan azamattar ótinish-tilekterin jetkizdi, dep habarlaıdy Egemen.kz.
Shahar basshysynyń qabyldaýyna jazylǵan Qazyǵurt shaǵyn aýdanynyń turǵyny G.Qarasaeva kósheni jaryqtandyrý, tazalyq, aıaldamany qalypqa keltirý jáne jol máselesin qozǵady.
Qala ákimi kóshelerdi jaryqtandyrýda birinshi kezekte áleýmettik nysandar ornalasqan ortalyq mańyzǵa ıe kóshelerdi qamtý josparlanǵanyn, sondyqtan Arystanbab kóshesin jaryqtandyrý 2023 jylǵy josparǵa enetinin aıtty. Otyrar kóshesi men Arystanbab kóshesi qıylysyndaǵy aıaldamany osy aıda qalypqa keltirý týraly sala basshysyna naqty tapsyrma berip, máseleni óz baqylaýyna aldy. Jol enin keńeıtý týraly ótinishi úılerdiń ornalasýy sebebinen múmkin emestigi túsindirildi. Kóshe tazalyǵy jóninde aýdan ákimine tapsyrma berip, turǵyndardy da tazalyqqa jaýapkershilikpen qaraýǵa shaqyrdy.
Al Aqjaıyq shaǵyn aýdanynyń turǵyny A.Qaldybekova múmkindigi shekteýli balalarǵa arnalǵan ońaltý ortalyǵyn ashý nıetimen bólisip, ortalyqty salýǵa jer telimin berý jóninde ótinish berdi.
«Qala ákimdigi ınvestısııalyq yntymaqtastyqqa árdaıym ashyq. Jaqsy bastama. Jobany egjeı-tegjeıli talqylaý úshin «Shymkent» ÁKK» basshylyǵy sizben jeke kezdesetin bolady», dedi Murat Áıtenov.
Nátıjesinde, ákim korporasııa tóraǵasyna ınvestısııalyq saıasatty iske asyrý máseleleri boıynsha naqty túsinikteme berýdi tapsyrdy.
Jer, zańsyz qurylys máselesimen kelgen azamattarǵa da qala ákimi zań turǵysynda sheshilý joldaryn túsindirip, árbir másele sheshimin tapqansha óz baqylaýynda bolatynyn aıtty.