Sońǵy jyldary О́skemende kólik nópiriniń kóbeıýine qaraı joldardy keńeıtý, oń jaqqa qosymsha burylystar jasaý syndy jumystar qolǵa alynǵan. Sondaı-aq úsh jyl qatarynan birqatar aýlalar abattandyrylyp, avtoturaqtar da keńeıtildi. Tek 2021 jyly ǵana 27 aýla jańartylsa, úsh jyl ishinde 92 aýla aýmaǵy abattandyrylǵan eken.
– Eki oryndyq pen ústel tennısin ornatý da abattandyrýǵa jatady. Biraq bizdiń túsinigimizde abattandyrýdyń jóni basqa. Biz balalarǵa ǵana emes, jalpy turǵyndarǵa yńǵaıly ári qaýipsiz aýla jasaýdy maqsat ettik, – deıdi О́skemen qalasynyń ákimi Jaqsylyq Omar.
О́skemendegi búgingi birqatar aýlany burynǵymen salystyrýǵa áste bolmaıdy. Buryn qalaı edi?! Temiri shodyraıǵan syrǵanaqtar, jalpıǵan beton formalar, taǵysyn taǵy. Onyń kútimine de asa nazar aýdarylmaǵan. Al qazirgi aýladaǵy oıyn jabdyqtary yqshamdalǵan, balalarǵa anaǵurlym qaýipsiz. Sportpen aınalysamyn degen jasósipirimderge de múmkindik mol. Týrnıkterdiń túr-túri, tennıs ústelderi, fýtbol alańdaryna deıin bar.
Aýlalardy abattandyrý jumystary aýmaqtyń erekshelikterine qaraı júzege asyp jatyr. Balalar alańy ádettegideı átkenshekter, karýselder, qum salǵyshtar ǵana emes, ártúrli zamanaýı oıyn keshenimen jabdyqtaldy. Sonymen qatar balalardyń qaýipsizdigi úshin jerge jumsaq jabyn tóselgen. Keń aýlalarǵa Street workout jabdyqtary ornatyldy.
Aýlalardaǵy taǵy bir basty másele, joǵaryda atap ótkendeı – kólikterdiń kóptigi, turaqtardyń azdyǵy. Keńes ókimeti tusynda boı kótergen úılerdiń aýlalarynda avtoturaqtar qarastyrylmaǵan edi. Aýlalardy abattandyrý, jańartý jumystarynyń nátıjesinde aýlalardaǵy kólik turaqtarynyń máselesi de sheshimin taýyp keledi.
– О́skemende avtokólikter sanynyń ósýine baılanysty avtoturaqtar tarlyq etip keledi. Keıbir úılerdiń aýlasynda ıne shanshyr oryn bolmaıdy. Biz aýlalardy abattandyrý arqyly bul máseleni de sheshemiz, – deıdi qala basshysy Jaqsylyq Muqashuly óz sózinde.
Kóptegen aýlada kólik joldary keńeıtildi, avtoturaqtarǵa oryn bólindi. Sonymen qatar jaıaý júrginshiler júrgizýshilerge kedergi jasamaýy úshin aýla ishilik trotýarlar tósele bastady. Jaıaý júrginshilerdiń joldary balalar men sport alańdaryna aparatyn úılerdiń boıymen tóselgen. Al qaýipsizdiktiń aldyn alý úshin abattandyrylǵan aýlalar tún mezgilinde samaladaı jarqyrap turady. Únemdi shamdar ornatylǵandyqtan, podezderdiń aldyndaǵy jaryq túni boıy janyp turady. Bul qaýipsizdiktiń taǵy bir elementi. Álbette, abattandyrý jumystary bolǵan soń jasyl jelekter egildi, oryndyqtar, qoqys jáshikteri ornatyldy.
– О́skemen ózge qalalarǵa úlgi bolsa eken deımiz. Ol úshin halyqtyń yńǵaıly ómir súrýine barynsha jaǵdaı jasaýǵa tyrysyp júrmiz. Abattandyrý jumystary da sonyń bir belgisi. Alaıda bıýdjet esebinen jeke aýmaqtardy tolyqtaı qamtý múmkin emes. Sol úshin biz abattandyrý baǵdarlamalaryna enýdiń sharttaryn belgiledik, – deıdi qala ákimi.
Aıta keterligi, oıyn alańdaryna arnalǵan ámbebap jabdyqtardy jergilikti kásipker shyǵaryp otyr. Aldaǵy ýaqyttarda turǵyndar oıyn keshenderin ózderi-aq jóndep, jańalap alýlaryna bolady. Degenmen jańa jabdyqtarǵa kútimmen qarasa, áli uzaq jyl turǵyndardy qýanta bermek.