23-29 qarasha aralyǵynda AQSh-tyń Hıýston qalasynda ústel tennısinen álem chempıonatynyń jalaýy jelbireıdi.
Dúbirli dodada Qazaqstannyń namysyn úsh sportshy qorǵaıdy. Olar – Kırıll Gerasımenko, Anastasııa Lavrova jáne Záýresh Aqasheva. Bul sportshylardyń barlyǵy da san márte el birinshiliginde top jaryp, kóptegen halyqaralyq jarysqa qatysqan. Máselen, álemdik reıtıngte 46-orynda turǵan 24 jastaǵy Gerasımenko 2016 jyly Rıo-de-Janeıro jáne 2021 jyly Tokıoda alaýy tutanǵan Olımpııa oıyndarynda jáne birneshe álem chempıonatynda óner kórsetti. ITTF tiziminde 167-satyǵa jaıǵasqan 26 jastaǵy Lavrova da Kúnshyǵys elinde ótken ǵalamdyq dodada baq synaǵan edi. Sol sekildi úzdikter reıtınginde 170-oryndy enshilep otyrǵan Aqashevanyń da qazirgi qarqyny jaman emes.
Hıýstondaǵy chempıonatta erler men áıelderdiń árqaısynan 128 sportshydan baq synaıdy. Odan bólek, 64 juptyń ónerin tamashalaımyz. Bul jarys olımpıadalyq júıe boıynsha ótedi. Iаǵnı jeńgeni birden kelesi kezeńge shyǵady, al jeńilgeni sol mezette kórermender qataryna qosylady.