Qazaqstannyń Tótenshe jaǵdaılar mınıstri Iýrıı Ilın «Abaı» shahtasynda jarylys bolǵan jerdegi jaǵdaı týraly aıtty, dep habarlaıdy Egemen.kz.
Ol atalǵan kómir kenishindegi barlyq jumystar toqtatylǵanyn jáne qazir ol jerde memlekettik komıssııa bar ekenin atap ótti.
«Shahtadan bir ýaqytta 8 myń tekshe metrden astam metan shyǵarylǵany anyqtaldy. Biz dál osy kenjarda metan konsentrasııasynyń 41%-dan astam kúrt ósýin baıqadyq. 100 tonnaǵa jýyq taý-ken úıindisi boldy. Búgingi kúni úıindilerdi jınaý jumystary jalǵasýda. Meniń oıymsha, kúnniń sońyna deıin shyǵarý jumystary aıaqtalady», dedi Iýrıı Ilın Senattaǵy Úkimet saǵatynda.
Mınıstr Úkimet saǵatynan keıin apattyń sebepterin anyqtaý úshin Qaraǵandy oblysyna attanatynyn habarlady.
«Birneshe ret biz «ArselorMıttal Temirtaý» obektilerindegi ónerkásiptik qaýipsizdiktiń qanaǵattanǵysyz jaı-kúıine nazar aýdardyq. Inspektorlar turaqty negizde taý-ken jumystaryn júrgizýge, kómir qabattaryn aldyn ala gazsyzdandyrýǵa, keıbir ýchaskelerde metan konsentrasııasyn avtomatty túrde anyqtaý júıesiniń bolmaýyna baılanysty qaýipsizdik talaptaryn júıeli túrde buzýshylyqtardy anyqtady», dedi Ilın.
Onyń aıtýynsha, sot organdaryna kómir shahtalarynyń qaýipti ýchaskelerinde taý-ken jumystaryn júrgizýdi toqtata turýǵa talap aryzdar jiberilgen. Biraq sot qaýipti ýchaskelerdi toqtata turý týraly sheshimdi qoldamaıdy jáne tek ákimshilik aıyppul salady.
«Sanksııalar men salynatyn ákimshilik aıyppuldardyń somasy tekseriletin sýbektilerge qatysty shamaly, bul olardy buzǵany úshin jaýapkershilikti nıvelırleýge ákep soǵady. Is júzinde ákimshilik aıyppul tóleý tıimdirek boldy», dedi TJM basshysy.
Eske sala ketsek, 7 qarashada «ArselorMıttal Temirtaý» AQ «Abaı» shahtasynda metan laqtyrylyp, kenetten jarylys boldy. Apat saldarynan eki adam zardap shegip, alty shahter qaza tapty. Is boıynsha tergeý jumystary bastaldy.