El Táýelsizdiginiń 30 jyldyǵyna oraı atqarylyp jatqan eldegi eleýli sharýanyń biri – Sosıalıstik Eńbek Eri, el ardaqtysy Erkin Áýelbekovke eskertkish ornatyldy.
Bar ǵumyryn týǵan halqyna arnaǵan el súıiktisi Erkin aǵaǵa qoıylǵan eskertkishtiń bıiktigi – 4,5 metr. Alystan menmundalap turatyn eskertkishtiń músinshisi Qazaqstan Sýretshiler odaǵynyń múshesi Toqsan Ermekov. Qola men granıtten qoıylǵan eskertkishtiń bar jumysy oblys ákimdiginiń qoldaýymen «Erkin Áýelbekov» qory arqyly júzege asyryldy. Qajetti qarajatty erin ardaqtaı biletin el azamattarynyń ózderi jınady.
Kórnekti memleket jáne qoǵam qaıratkeri Erkin Áýelbekovtiń eskertkishin ornatý barsha kókshetaýlyqtardyń kópten kútken tolǵanysty sáti edi, dedi óńir basshysy saltanatty sharada, Erkin aǵamyz Elbasy Nursultan Nazarbaevtyń qyzmettes serigi boldy. Zamanynda Kókshetaý, Torǵaı, Qyzylorda oblystarynyń áleýmettik-turmystyq jaǵdaıynyń jaqsarýyna ólsheýsiz úles qosty.
Sóz sońynda óńir basshysy eskertkish ornatylǵan osy alleıaǵa Erkin Áýelbekovtyń esimin berý týraly usynys jasady. Bul usynysty jınalǵan kópshilik zor qýanyshpen qoldady. 1999 jyly Kókshetaý qalasynyń ortalyq kósheleriniń birine Erkin Áýelbekovtyń esimi berilgen bolatyn. Eskertkish te sol kósheniń boıyna qoıyldy. Byltyr memleket qaıratkeriniń 90 jyldyǵy keńinen atalyp ótildi. Jaman tumaý jaılap turǵan kezde de onlaı jáne oflaın formattarda el ardaǵy Erkin aǵamyzdyń eńbegi saralanyp, jas urpaqqa úlgi etildi. «Kóksheniń asyl perzenti», «О́ńir dańqyn asyrǵan» atty kitaptary jaryq kórdi. Eskertkishtiń ashylý saltanatyna Qostanaı men Qyzylorda oblystarynan aǵamyzdyń kózin kórgen jurtshylyq kóptep jınaldy. Saltanatty sharada oblys ákimi Ermek Marjyqpaev, Kókshetaý qalasynyń qurmetti azamaty, densaýlyq saqtaý salasynyń ardageri Bolat Janádilov, qor basshysy Orazken Nurtazın qaıratkerdiń ómiri men eren eńbegin qamtyp sóz sóıledi.
Eńseli eskertkish jurt kútkendeı aıshyqty bolyp shyqty. Úsh oblysty basqaryp, eki mınıstrlikke jetekshilik etken, 38 jasynda Kókshetaý oblysynyń basshysy retinde óńirdiń óńin keltirýge aıanbaı at salysqan, qyryqqa jýyq qazaq aýyldaryn irilendirip irgeli sharýashylyqqa aınaldyrǵan eńseli erdiń eńbegi keıingi urpaqqa ónege.
Ǵylymı-praktıkalyq konferensııada Qyzylorda, Qostanaı, Soltústik Qazaqstan oblystarynyń eńbek ardagerleri óz estelikterin aıtyp, jyldar shejiresinen syr shertti. Erkin aǵamyzdyń boıyndaǵy eljandylyq úlgi etildi.
Kókshetaý qalasy.