Qostanaıda Qazaq Epos aǵartý jobasy aıasynda el kóleminde ótip jatqan «Tulpar minip, tý alǵan» baıqaýynyń oblystyq kezeńi aıaqtaldy. Elbasy Nursultan Nazarbaevtyń «Bolashaqqa baǵdar: rýhanı jańǵyrý», «Uly dalanyń jeti qyry» maqalalarynda júktelgen mindetterdi júzege asyrý maqsatynda uıymdastyrylǵan sharanyń basty maqsaty – batyrlar jyryn nasıhattaý arqyly oqýshylardy halyq poezııasyna degen súıispenshilikke, patrıotızmge tárbıeleý.
Bıyl baıqaýdyń aýdandyq kezeńinde 20 oqýshy «Edige batyr» jyryn jatqa aıtty. Baıqaýǵa qatysqan oqýshylar 6-11-synyptarda oqıdy. Qazylar alqasy ár úmitkerdiń mánerlep oqý sheberligine mán berip, jyrda kezdesetin kónergen sózderdiń maǵynasyn surap otyrdy. Jyrdy jatqa aıtyp shyqqannan keıin oqýshylar qazaq ádebıeti pániniń oqý baǵdarlamasy negizinde ázirlengen suraqtarǵa jaýap berdi.
– «Edige batyr» jyry túrki tildes halyqtardyń birazynda bar. Sondyqtan tili aýyr, kónergen sózder jıi kezdesedi. Mysaly, jyrda, «...sol qyz býaz boldy», «...aı dese aýzy joq, kún dese kózi joq» degen sııaqty búgingi tildik normaǵa jat sóz tirkesteri jıi kezdesedi. Osynyń bári balalarǵa, ásirese, 6-7-synyp oqýshylaryna qıyndyq keltirip jatyr. Jalpy, balalar jaqsy daıyndalyp kelgen, – dedi qazylar alqasynyń múshesi, Qostanaı oblystyq qazaq drama teatrynyń basshysy Álimhan Myrzahan.
Baıqaýdyń bas júldesin Rýdnyı qalasyndaǵy №7 mektep-gımnazııanyń 10-synyp oqýshysy Nursıla Ádebova jeńip alyp, 600 myń teńge qarjylaı syılyqqa ıe boldy. Jeńimpazdyń ustazy Qymbat Birmanova oblystyq bilim basqarmasynyń basshysy Záýre Baımenovanyń qolynan 500 myń teńge aqshalaı syılyq aldy. Qarabalyq aýdanynan kelgen M.Seralın atyndaǵy mekteptiń oqýshysy Altynaı О́mirzaqova birinshi orynǵa laıyq dep tanylyp, jarty mln teńgeni qanjyǵalady. Altynaıdyń muǵalimi Almabıke Eskendirovaǵa 450 myń teńge tıdi. Al úshinshi oryn alǵan Aısary mektebiniń shákirti Shapaǵat Qurmanǵazyqyzy 300 myń teńgege ıe boldy.
Oblystyq kezeńniń jeńimpazy Nursıla Ádebova endi respýblıkalyq baıqaýda baq synaıtyn bolady.