Jyl basynan beri Qazaqstannyń Ishki ister mınıstrligi 2 myńnan astam esirtki qylmysyn anyqtady, onyń ishinde esirtkini ótkizýdiń 1300 faktisi jáne asa iri mólsherde 360-tan astam esirtki saqtaý faktisi anyqtaldy. Bul týraly QR IIM ókili Shuǵyla Turlybek málimdedi, dep habarlaıdy Egemen.kz.
«Zańsyz aınalymnan 12,5 tonna esirtki, onyń ishinde 5 kg astam geroın tárkilendi. Shamamen 9,5 tonna marıhýana, 380 kg gashısh jáne 110 kg sıntetıkalyq esirtki men segiz uıymdasqan qylmystyq esirtki toby men 14 jasyryn esirtki zerthanasynyń qyzmeti joıyldy», dep naqtylady ol.
Mınıstrlik elimizdiń barlyq vokzaldarynda «Esirtkisiz bolashaqqa» respýblıkalyq aksııasynyń bastalýyn jarııalady.
Aksııanyń maqsaty – azamattardy esirtkiniń zańsyz aınalymyna qatysýdyń saldary týraly habardar etý.
Esterińizge sala keteıik, 2021 jyldyń qazan aıynda Qazaqstanda sıntetıkalyq esirtkini saqtaǵany úshin jaza qatańdatyldy. Tipti bir gramm «sıntetıka» úshin bas bostandyǵynan aıyrylýy múmkin.