Táýelsizdik alǵaly 30 jylda Mańǵystaý oblysynda 11 mln 300 myń sharshy metr turǵyn úı paıdalanýǵa berildi. Ásirese turǵyn úı qurylysy oblys ortalyǵynda qarqyndy júrýde. Aqtaýda sońǵy bes jylda jańa 11 shaǵyn aýdan boı kóterdi.
Oblys ákiminiń baspasóz qyzmetiniń málimetinshe, 2021 jyldyń jospary 1,201 myń sharshy metrdi qurasa, bıylǵy 10 aıdyń qorytyndysy boıynsha 954 myń sharshy metr turǵyn úı tapsyrylǵan. Sondaı-aq 2020 jyly «Nurly jer» baǵdarlamasyn damytýdyń 2020-2025 jyldarǵa arnalǵan memlekettik baǵdarlamasy aıasynda jalǵa beriletin turǵyn úı qurylysyna jáne satyp alýǵa 2,4 mlrd teńge bólingen. Bul qarajat kólemi 23,5 myń sharshy metrlik 305 páterli turǵyn úılerdiń qurylysyna jáne 67 páter satyp alýǵa jumsaldy.
«Nurly jer» baǵdarlamasy boıynsha Aqtaý qalasynyń jańa shaǵyn aýdandarynda jańadan salynǵan turǵyn úılerdi ınjenerlik jelilermen qamtamasyz etýge respýblıkalyq bıýdjetten bólingen 3,2 mlrd teńge tolyq ıgerilgen. Al bıyl «Nurly jer» memlekettik baǵdarlamasy aıasynda 1 407 páterlik turǵyn úılerdiń qurylysyn aıaqtaý josparlanǵan.
– Qalanyń jańa shaǵyn aýdandarynda jeke qurylys salýshylardyń qatysýymen 100-den astam kóppáterli turǵyn úıdiń qurylysy júrgizilýde. Olardyń belgili bir bóligi osy jyldyń sońyna deıin paıdalanýǵa beriledi. Injenerlik jelilerdiń qurylysyna Ulttyq qordan 4,5 mlrd teńge bólindi. Ortalyq memlekettik organdar 13 jobany iske asyrýǵa kelisim berdi. Barlyq joba jyl sońyna deıin aıaqtalady dep kútilýde, – deıdi Mańǵystaý oblysy qurylys, sáýlet jáne qala qurylysy basqarmasy basshysynyń mindetin atqarýshy Aınur Mankeshova.
Qurylystyń qarqyndylyǵy jáne sáýlet-symbaty mańyzdy desek te, úısizderdiń baspanaly bolýy aldyńǵy qajettilik. Sondyqtan Mańǵystaý oblysynda salynyp jatqan turǵyn úıler úısizderdiń máselesin sheshýge sep bolsa deımiz.
Mańǵystaý oblysy