Májilis tóraǵasy Nurlan Nyǵmatýlın Eýropa Keńesiniń Parlamenttik Assambleıasynyń tóraǵasy Rık Demspen kezdesti, dep habarlaıdy Egemen.kz.
Is-shara barysynda Nurlan Nyǵmatýlın bıylǵy jyl elimiz úshin aıtýly oqıǵa Qazaqstan Táýelsizdiginiń 30 jyldyǵy ekenin atap ótip, Memleket basshysy Qasym-Jomart Toqaevtyń bastamasymen elimizde ótip jatqan saıası júıeni reformalaý, ekonomıkany jańǵyrtý, azamattyq qoǵamdy damytý úderisterine erekshe nazar aýdardy.
Májilis tóraǵasy mártebeli meıramǵa saılaý prosesin demokratııalandyrý jáne saılaý zańnamasyn jetildirý, áıelderdiń quqyqtary men múmkindikterin keńeıtý, parlamenttik oppozısııa ınstıtýtyn zańnamalyq deńgeıde bekitý maqsatyndaǵy keshendi reformalardy atap ótti.
О́z kezeginde, Rık Dems Qazaqstannyń Parlamentte áıelderdiń ókildik etý jónindegi kúsh-jigerin joǵary baǵalaıtynyn aıtty. Odan ári taraptar Qazaqstan men Eýropa Keńesiniń yntymaqtastyǵyn damytýdy qoldaı otyryp, ózara is-qımyl baǵyttaryn, onyń ishinde Qazaqstannyń birqatar eýropalyq konvensııalarǵa qosylý, sondaı-aq ekologııa jáne klımat máseleleri boıynsha yntymaqtastyq máselelerin talqylady.
Nurlan Nyǵmatýlın Ombýdsmen ınstıtýtyn damytý arqyly adam jáne azamattyń quqyqtary men bostandyqtaryn qorǵaý salasyndaǵy zańnamany jetildirý, sybaılas jemqorlyqqa qarsy is-qımyl, bala quqyqtaryn qorǵaý, eriktiler qyzmeti jáne ózge de salalardaǵy qazirgi ýaqytta Parlamentte jalǵasyp jatqan jumystar týraly habardar etti.