Polsha-Belarýs shekarasyndaǵy myńdaǵan mıgranttyń problemasy Eýroodaq elderiniń basaýrýyna aınaldy. Taıaý Shyǵystan aldymen Belarýs eline kelip, endi Polsha men Baltyq elderi arqyly ishki Eýropaǵa ótýdi kózdegen bosqyndar 8 qarashadan beri dalada túnep keledi, dep jazady Egemen.kz.
Sońǵy málimetterge sáıkes, Belarýs aýmaǵynan Polsha shekarasyn sońǵy táýlik ishinde 223 mıgrant zańsyz kesip ótpek bolǵan. Bul – mıgranttardyń arasynda «Germanııaǵa alyp ketýge kelgen avtobýs» jaıly qaýesetter taratyp, mıgranttardy zańsyz áreketke ıtermelegisi kelgenderdiń áreketi dep habarlady Polshanyń Ishki ister mınıstrligi. Polsha bıligi shekara aýmaǵyndaǵy barlyq azamattardyń uıaly telefondaryna birneshe tilde arnaıy habarlama jiberip, bul qaýesetke senbeýge shaqyrýda.
Polıak quqyq qorǵaý qyzmetkerleri 14 qarasha kúni el aýmaǵyna zańsyz engen 77 mıgrantty elden shyǵaryp jiberdi. Shekarany zańsyz kesip ótpek bolǵandar shekara qyzmetkerlerine tas atyp, tártipsizdik jasaǵan. Sonyń saldarynan laqtyrylǵan tastardyń biri shekarashynyń basyna tıip, onyń kaskasyn syndyryp jibergen.
Sonymen qatar shekarada qoıylǵan arnaıy bógetterdi buzǵan bir top adamnyń 22-si ustaldy. Keıin olardyń bári Irak azamattary ekeni anyqtalǵan. Buzaqylarǵa zańsyz áreket jasaýǵa kómekteskeni úshin Grýzııanyń eki azamaty jáne Polsha men Sırııa azamattary shekarashylardyń qolyna tústi. Olarǵa 13 mıgrantty shekaradan zańsyz ótkizbek boldy degen aıyp taǵylýda.
Polsha Qorǵanys mınıstrliginiń aıtýynsha, Belarýs quqyq qorǵaý qyzmetkerleriniń tarapynan da arandatýshylyq tirkelýde.
«Keshe belarýstardyń provokasııasy kúsheıe tústi. Shýdzıalovo aýmaǵynda olardyń qyzmetkerleri bizdiń soldattarǵa eki márte tas atqan. Bul oqıǵadan eshkim zardap shekken joq», delingen mınıstrliktiń Tvıtter-paraqshasynda.
Atalǵan vedomstvo basshysy Polsha shekarasynyń myzǵymastyǵyn jáne qatań qorǵaýda ekenin aıtty.
Polsha IIM-niń baspasóz qyzmetiniń jazýynsha, memlekettik quqyq qorǵaý qyzmetteri kez kelgen jaǵdaıǵa daıyn otyr.
Batys bul daǵdarystyń «qoldan jasalǵanyn» jáne Lýkashenkonyń Eýropa engizgen sanksııalarǵa qarsy jaýaby dep baǵalaýda. Sonymen qatar buǵan Reseıdiń de qatysy bar degen boljamdar halyqaralyq medıada jıi paıda bolýda. Resmı Varshava Lýkashenko men Pýtındi «gangsterlik taktıka» men «gıbrıdtik manıpýlıasııa» qoldanýda dep aıyptaýda.