QR Prezıdenti Qasym-Jomart Toqaev ishki ister organdaryn beınebaqylaýmen qamtýdyń mańyzdylyǵyna toqtaldy, dep habarlaıdy Egemen.kz.
«Osydan bir aı buryn alty óńirde múgedektikti anyqtaý boıynsha proaktıvti syrttaı qyzmet kórsetýdiń pılottyq jobasyn iske asyrý bastaldy. Ol bizdiń otandastarymyzdyń arasynda suranysqa ıe jáne jańa jyldan bastap búkil el boıynsha jańa formatqa aýystyrylatyn bolady. Taǵy bir mysal – polısııanyń qyzmettik úı-jaılary men QAJ mekemelerinde jappaı beınebaqylaý júıesin engizý», dep atap ótti Qasym-Jomart Toqaev Ulttyq qoǵamdyq senim keńesiniń VI otyrysynda.
«Bul jumys 2023 jyldyń sońyna deıin jalǵasady. Alaıda, osy jyldyń sońyna deıin barlyq polısııa bólimderi beınebaqylaýmen qamtylady», dep túıindedi Memleket basshysy.
Eske sala ketsek, elordada Ulttyq qoǵamdyq senim keńesiniń VI otyrysy bastaldy. Is-shara barysynda Ulttyq keńes sheńberinde buryn berilgen Prezıdent tapsyrmalarynyń iske asyrylý barysy talqylanady, sondaı-aq qoǵamdyq, áleýmettik-ekonomıkalyq jáne óńirlik damý máseleleri boıynsha JSUK músheleriniń usynystary qaralady dep kútilýde. Otyrys túrli óńirlerden qatysýshylardy qosý arqyly onlaın-formatta ótip jatyr.