Eldiń senimi bárinen qymbat

«Nur Otan» partııasy Tóraǵasynyń birinshi orynbasary Baýyrjan Baıbek jumys saparymen Pavlodar oblysynda boldy

Keshe jumys sapary aıasyn­da «Nur Otan» partııasy Tóra­ǵa­synyń birinshi orynbasary Baýyrjan Baıbek múmkindigi shekteýli jandarǵa arnalǵan bos jumys oryndary jármeńkesine baryp, partııanyń Pavlodar ob­ly­syndaǵy fılıalynyń kezekten tys XIV konferensııasyna qatysty. Elbasy, «Nur Otan» par­tııa­synyń Tóraǵasy N.Á.Nazar­baevtyń «Qazaqstan joly – 2050: bir maqsat, bir múdde, bir bolashaq» atty Qazaqstan hal­qy­na arnaǵan Joldaýynda bergen tapsyrmasyna sáıkes, «Nur Otan» partııasy múmkindigi shekteýli jandardy eńbekpen qam­tý jáne ómir sapasyn jaqsar­tý maqsatynda jumys júrgizýde. Al oblys ortalyǵynda ót­ken jármeńkede 70-ke jýyq ká­siporyn 600-deı jumys oryndaryn usyndy. Onyń ishinde, 400-ge jýyq múgedek jandy oqytyp, jumys taýyp berý máselesi de sheshilmekshi. Bizdiń oblysta 30 myńǵa jýyq múgedek bar. Qımyl-qozǵalysynda azdaǵan qıyndyq bar demeseńiz, olardyń kóbi eńbekke jaramdy adamdar. Oblysta bul kúnderi 1 myń múgedek qana jumyspen qam­tyl­ǵan. О́ńirdegi múm­kindigi shekteýli jandardyń teń jartysy aýyldyq jerlerde turady. Oblysta «Jumyspen qamtý-2020» jol kartasy baǵ­darlamasyna qatysýǵa da ba­symdyq berilgen. О́tken jyly baǵdarlama sheńberinde 5,2 mlrd. teńge bólinip, 1257 adam jumysqa ornalastyrylypty. Sóıtip, oblys orta­ly­ǵyn­daǵy jumys berýshiler tara­pynan uıymdastyrylǵan jár­meńkege jınalǵandardyń arasynda izdegen jumysyn taýyp, qýa­nyp qaıtyp jatqandar da boldy. Al, «Nur Otan» partııa­sy jalpy elimiz boıynsha múmkindigi shekteýli 5000 adamdy jumyspen qamtýdy aldaryna maqsat etip qoıypty. B.Baı­bektiń aıtýynsha, ár oblys múmkindigi shekteýli 500 adam­ǵa laıyqty jumys taýyp bere alsa, onda bul maqsattyń oryn­dalǵany deýge bolady. Partııa elimizdegi múmkindigi shekteýdi jandardy jumyspen qamtýǵa aıryqsha mán berýde. Elbasy Joldaýy endi bizdiń qoǵamnyń da órkenıet talaptaryna saı múmkindik jasap, múgedek jandardy da qatarǵa qosyp, ortaǵa alýǵa shaqyrady. Bul jumystarǵa nurotandyqtar óz úlesin qosady. Sondaı-aq, partııa óz aldyna múmkindigi shekteýli, densaýlyǵynda múkisi bar balalar úshin ınklıýzıvti bilim berýdi kezek kúttirmes mindetterdiń biri retinde qoıyp otyr. Sondyqtan da, jumys sa­parynyń alǵashqy nysany dıag­nozy óte aýyr balalarǵa me­dısınalyq-psıhologııalyq jáne pedagogıkalyq turǵyda keshendi kómek kórsetetin «Samal» ońaltý ortalyǵy boldy. Ortalyq Qazaqstannyń re­kordtar kitabyna ońaltý jumystaryna tuńǵysh ret «ǵa­ryshtyq» kostıýmder tehno­lo­gııa­syn paıdalanǵan orta retinde kirip otyr. Jumys jasap jatqan shırek ǵasyr ýaqyttan beri mun­da 4,5 myń bala em-dom alyp, 10 tárbıelenýshi ońaltý men baýlý úderisterinen keıin osynda zańger, esepshi, psıholog, EVM operatory jáne t.b. esebinde jumys atqaryp, qalyp qoıǵan. Búginde «Nur Otan» partııasy «Kedergisiz keleshek» jobasyn iske asyrýda. Atalǵan joba aınalysqa engen alǵashqy aıdyń ózinde 500-den asa múgedek jan jumysqa turyp úlgerdi. Jambyl oblysyndaǵy bos jumys oryndary jármeńkesinde taǵy da múmkindigi shekteýli 200 kisi ju­mysqa turdy. Pavlodarda partııa Tóraǵa­sy­nyń birinshi orynbasary mú­gedek azamattardyń ju­mys­­pen qamtylýy boıynsha oblys­ta qolǵa alynyp jat­qan is-sharalarmen tanysyp, múm­kindigi shekteýli jandar úshin uıymdastyrylǵan jármeńkege qatysýshylarmen jolyqty. «Biz jyl saıyn 5 myń mú­ge­dek jannyń jumysqa orna­lasýyna qol jetkizýdi kózdeý­demiz. Búginde memleket, azamattyq sektor, bıznes múm­kin­digi shekteýli jandardy bel­sendi áleýmettik ortaǵa tartý máselesin birlesip sheshýi kerek. Partııa bul úderisti úılestirýge barlyq resýrstaryn jumsaıtyn bolady. Partııa Doktrınasynda kórinis tapqan qundylyq – yntymaqtastyq degenimiz osy», dep atap ótti B.Baıbek. Jumys sapary barysynda partııa Tóraǵasynyń birinshi orynbasary oblystyq jáne qalalyq máslıhattardyń depýtattarymen kezdesip, óńir­ler­men beınekonferensııa ótkiz­di. Is-shara barysynda «Nur Otan» fraksııasynyń óńirler­degi jumysynyń kúsheı­tilýi kerektigi basa aıtylyp, partııanyń saılaýaldy tuǵyr­namasy máseleleriniń sarap­shy toptar jıyndarynda qara­latyny habarlandy. Kúnniń ekinshi jartysynda B.Baıbek partııanyń Pavlodar oblysyndaǵy fılıalynyń kezekten tys XIV konferensııasyna qatysty. Kezdesý barysynda sharaǵa qatysýshylarǵa partııa Tóraǵasynyń birinshi orynbasary qazirgi tańda óńirlerdegi jumysqa aıryqsha kóńil bólinip otyrǵandyǵyn atap ótti. Atap aıtqanda, bastap maqsat óńirlik fılıaldardyń tıimdiligin arttyrý jáne qo­ǵamdastyqpen jumys júrgizip, jergilikti jer­lerdegi shynaıy ahýaldy monıtorıngteý ekendigi kóldeneń tartyldy. «Elbasynyń memlekettik baǵdaryn tıimdi iske asyrý úshin partııa jobalyq-maqsattyq ádiske negizdelgen jańa jumys pishinine kóshti. Iаǵnı, sońǵy nátıje men naqty saılaýshyǵa anyq baǵdarlaý mańyzdy sanalady. 1 naýryzda «Nur Otan» partııasyna 15 jyl tolady. Bul elimizdiń ósip-órkendeýi men árbir qazaqstandyqtyń ál-aýqatyn arttyrýǵa baǵyttalǵan naqty qoldanbaly isterdiń jy­ly bolady», dedi B.Baıbek. Sondaı-aq, konferensııada par­tııanyń Pavlodar oblysy fı­lıalynyń tóraǵasy bolyp oblys ákimi Qanat Bozymbaev saı­landy. B.Baıbek oblystyq fı­lıal basshysyna partııanyń jańa úlgidegi bıletin tabys etti. Farıda BYQAI, «Egemen Qazaqstan». Pavlodar oblysy.