Oblystyq qazaq drama teatrynda Raqymjan Otarbaıdyń «Kóleńke» eksperımenttik qoıylymynyń tusaýy kesildi. Dos Qubashtyń rejısserligimen sahnalanǵan bul dramany dúnıege qunyqqan, nashaqorlyqqa boı aldyrǵan, jat dinı aǵymnyń arbaýynda júrgen azamattar kórse ǵoı deımiz. Sabaq bolar ma edi?!
Bir otbasyndaǵy keleńsiz jaǵdaılar arqyly búgingi qoǵamnyń qasiretin kórsetken qoıylym túısiksizdiń ózine oı túıgizýi bek múmkin. Ártister adam men qoǵam, tulǵa men tobyr tartysqan zamannyń shyndyǵyn búkpesiz sýrettep, avtordyń oıyn kórermenge anyq jetkizdi.
Bereke-birlikten jurdaı áýlettiń úlken uly tenderge túsip, qomaqty qarjy utqanymen maqtanady, bolashaqqa jospar qurady. Menmendigi basymdaý. Onyń eki júzdi kelinshegi dúkenniń ıesi. Oı-órisi taıazdaý áıel. Ortanshy uldary ne bitirip júrgeni belgisiz. Al kenje ul men kelin jat dinı aǵymǵa sanalary ýlanǵan, tipti áke-sheshesinen bezinip ketýge ázir. Týǵandaryn kápir dep, aralasýdan qalǵan. Áke-sheshesi bolsa, bala-shaǵasynyń qas-qabaǵyn baǵyp, tileýin tilep otyrýdan basqa amaldary qalmaǵan.
Shıelenistiń bári sholjańdaǵan kenje qyzdarynan bastalady. Qydyryp Býrabaıǵa baryp kelemin dep, iri kólemde esirtki áketip bara jatqandardyń kóligine soqtyǵysqan. Sodan áýlettiń tóbesine qara bult úıirilip, aqyr sońy bes bólmeli baspanalarynan aıyrylǵan. Úlken uldary shetelge qashyp tynǵan. Jat dinı aǵymnyń jeteginde júrgen kenje ul men kelinderi Sırııadaǵy ushqan oq pen jarylystardyń ortasynan bir-aq shyqqan. Shańyraqtyń ortaǵa túskeni osy shyǵar. Iá, qoıylym qoǵamnyń aınasy ispetti. Eń bastysy, zaman derti dendep, qazaqtyń qaımaǵy buzylmasa eken dep tiledik. «Kóleńke» qoıylymynyń maqsaty da sol edi, eldiń oıyn túzeý...
О́skemen