Shaıbaly hokkeıden Qaraǵandynyń «Saryarqasy» el chempıonatynyń kezekti týr oıynynda О́skemenniń «Torpedosyn» óz aıdynynda qabyldap, iri eseppen jeńiske jetti.
«Qaraǵandy-Arenada» ótken kezdesýde «kenshiler» komandasy qarsylastarynyń qaqpasyna jaýapsyz bes shaıba soqty. Birinshi kezeńniń 30-sekýndynda Mıhaıl Rahmanovtyń pasynan keıin Stepan Grımzın matchtyń esebin ashsa, 15-mınýtta Nıkıta Anohın tablodaǵy kórsetkishti 2:0-ge jetkizdi. Birinshi kezeńniń aıaqtalýyna bes sekýnd qalǵanda Mıhaıl Rahmanov endi Nıkıta Anohovskııge gol soǵatyn tamasha múmkindik jasap berdi – 3:0.
Úzilisten keıin de aıdyn ıeleri qarqynyn báseńdetken joq. 35-mınýtta byltyr «Barys» sapynda QHL-da óner kórsetken Saıan Danııar mergendigimen kózge tússe, úshinshi kezeńniń orta tusynda dál sol S.Danııar dýbldiń avtory atanyp, oıynnyń núktesin qoıdy. Qorytyndy esep – 5:0.
«Saryarqa» bul jeńisinen keıin týrnır kestesinde 30 upaımen kósh bastaǵan edi. Alaıda kúni keshe Kókshetaýdyń «Arlany» syrt aıdynda «Temirtaýdy» býllıt serııasynda 4:3 esebimen jeńip, «kenshiler» komandasyn ekinshi orynǵa yǵystyrdy. Al О́skemenniń «Torpedosy» altynshy orynǵa túsip qaldy.