Bıyl elimizdegi Dúnıejúzilik JITS-ke qarsy kúres kúni 15 qarashada Almatyda «AITV: árqaısysyn tyńda» naýqanymen bastalyp, 15-25 qarasha aralyǵynda jer jerlerde osy uranmen ótedi. Qarap otyrsaq, JITS degen daýasyz derttiń anyqtalyp, alǵashqy oqıǵalary tirkelgenine de qyryq jyl óte shyǵypty, biraq AITV áli de jahandyq indet bolyp qala beredi.
Dúnıejúzilik JITS-ke qarsy kúres kúni IýNEIDS JITS indetin toqtatyp qana qoımaı, halyqtyń negizgi toptarynyń, AITV-men ómir súretin adamdardyń quqyqtaryn qorǵaýǵa, COVID-19 kúrestiń tıimdiligin arttyrýǵa jáne ekonomıkanyń qalpyna kelýin jáne onyń turaqtylyǵyn qamtamasyz etýge shaqyrady.
– AITV-men ómir súretin adamdarǵa qatysty alalaý men kemsitýshilikti joıý, barlyq muqtajdy qajetti dári-dármektermen jáne qyzmettermen qamtamasyz etý, adam quqyqtary men genderlik teńdikke negizdelgen tásilderdi paıdalaný – bul AITV jáne COVID-19 pandemııasyn toqtatýdyń basty sharttary, – deıdi Almaty qalasy JITS aldyn alý jáne oǵan qarsy kúres ortalyǵynyń bas dárigeri Marat Tókeev.
Naýqan kúnderi Almaty qalalyq JITS ortalyǵynyń dárigerleri qoǵamdastyqtarmen jáne úkimettik emes qoǵamdyq uıymdarmen birlesip, halyqtyń AITV-ınfeksııasynyń jáne COVID-19 aldyn alý sharalary týraly bilimin arttyrýǵa baǵyttalǵan túrli is-sharalar ótkizedi. Bıznes-qurylymdardyń qyzmetkerleri úshin AITV-ǵa jedel testileý ótkizý jáne aqparattyq-bilim berý materıaldaryn taratý arqyly aksııalar uıymdastyrylatyn bolady.
Bilimdi kúsheıtý, stıgma men AITV-men ómir súretin adamdardy kemsitýge jol bermeý maqsatynda jalpy bilim beretin mektepter men kolledjderdiń pedagogteri arasynda áleýmettik jelilerde «Toqta AITV Almaty» heshtegimen beıne-ótinish jarııalaý arqyly chellendj ótedi.
Testileýdi tanymal etý jáne AITV-nyń berilý joldary týraly habardar bolýdy arttyrý úshin JITS ortalyǵynyń qyzmetkerleri dárigerlerge, polıseılerge, pedagogterge, áskerı qyzmetshilerge, qylmystyq-atqarý júıesiniń qyzmetkerlerine, aýtrıch-qyzmetkerlerine onlaın rejiminde trenıngter men semınarlar ótkizedi. S.Asfendııarov atyndaǵy Qazaq ulttyq medısına ýnıversıtetiniń stýdentteri úshin «AITV jáne stıgma/dıskrımınasııa» onlaın-pikirsaıysy josparlanǵan. JITS ortalyǵynyń dárigerleri qalanyń medısınalyq uıymdary zerthanalarynyń qyzmetkerleri úshin «AITV-ǵa aldyn ala taldaý kezeńinde testileýdiń sapasyn qamtamasyz etý» taqyrybynda keńes uıymdastyrady.
AITV-men ómir súretin adamdar úshin JITS ortalyǵynyń aýmaǵynda flıýromashınany paıdalana otyryp, týberkýlezge skrınıng, sondaı-aq Gepatolog pen onkomammologtiń konsýltasııasyn ótkizý josparlanyp otyr.
JITS ortalyǵynyń dúnıejúzilik naýqandy ótkizý boıynsha seriktesteri arasynda ákimdik, qoǵamdyq densaýlyq basqarmasy, Almaty qalasynyń bilim basqarmasy, IID, QAJK, halyqaralyq, qoǵamdyq úkimettik emes jáne basqa da uıymdar bar. Mysaly, 2021 jyldyń 1 qarashasyndaǵy sońǵy derekterge sáıkes, Almaty qalalyq JITS ortalyǵynda AITV-ahýaldy 3 824 adam esepte tur. Sońǵy jyldary jynystyq jolmen berilýdiń ósý tendensııasy baıqaldy. 2021 jyldyń on aıynda jynystyq jolmen berilý AITV-juqpasynyń jańa jaǵdaılarynyń 79,3 paıyzyn, parenteraldi esirtkini kóktamyr ishine qoldaný faktory 15,2 paıyzyn quraıdy.
ALMATY