Senat tóraǵasy Máýlen Áshimbaev elimizde iri kásiporyndarǵa beriletin salyqtyq jeńildikterdi jan-jaqty zerdeleý kerektigin aıtty, dep habarlaıdy Egemen.kz.
«Úkimet úlken jumys jasap jatyr. Bul jumystardyń barlyǵyn depýtattar da qoldaıdy. Osy jumystardyń aıasynda aldaǵy ýaqytta salyqtyq jeńildikterdi de bir saraptap qoıǵan artyq bolmaıtyn shyǵar dep esepteımiz. Jalpy, bizdiń qolymyzdaǵy aqparatqa sáıkes, 2020 jyly salyqtyq jeńildikterge baılanysty bıýdjet túsimi 4,8 trln teńgeden astam somaǵa kem boldy. Bul úlken soma. Negizgi salyqtyq jeńildikter shaǵyn kásiporyndarǵa emes, úlken kásiporyndarǵa berilip jatqany belgili», dedi ol Senattyń jalpy otyrysynda.
Senat spıkeriniń dereginshe, osy jeńildikterdiń 40 paıyzy qarjy jáne taý-ken óndirý salasyndaǵy kásiporyndarǵa tıesili bolyp otyr.
«Bul rette salyqtyq jeńildikterden bas tartaıyq degen áńgime joq. Ol halyqaralyq tájirıbe. Ony qoldanýymyz kerek, osy baǵytta jumys isteýimiz kerek. Degenmen osy jeńildikter memleketimizge ne berip jatyr? Ekonomıkamyzǵa qandaı áserin tıgizedi? Sony da bir saraptap qoıǵan artyq bolmas. Osy jyldyń basynda Prezıdent Salyq kodeksine túgendeý jasaý kerektigin aıtqan bolatyn. Osy jumystyń aıasynda salyqtyq jeńildikterdi de jan-jaqty zerdeleısizder dep senemiz. Sol jumystyń qorytyndysy boıynsha Parlamentke aqparat beresizder dep úmittenemiz», dedi Máýlen Áshimbaev.