Koronavırýs indeti álemdik saıasat pen ekonomıkany túbegeıli ózgeriske ushyratty. Bul týraly QR Syrtqy ister mınıstrliginiń keńeıtilgen alqa májilisinde QR Prezıdenti Qasym-Jomart Toqaev málim etti, dep habarlaıdy Egemen.kz.
«Syrtqy saıasatty «Halyq únine qulaq asatyn memleket» tujyrymdamasyna saı júrgizip, onyń tıimdiligin barynsha arttyrý. Qazir Qazaqstannyń syrtqa baǵyttalǵan jumysynda birtutas jalpy memlekettik strategııa joq deýge bolady. Bul - júıeli sıpattaǵy másele. Syrtqy ister mınıstri Úkimette erekshe mártebege ıe bolyp, Premer-Mınıstrdiń orynbasary deńgeıine kóterildi. Osyǵan oraı Syrtqy ister mınıstrligi tyǵyz mekemearalyq úılestirý jumysyn tıimdi atqarýy kerek», dedi Memleket basshysy.
Prezıdenttiń aıtýynsha, memlekettik apparat ishindegi baılanys, ózara yqpaldastyq álsiz. Jekelegen mekemelerdiń múddesine basymdyq berilip jatady. Bul birazdan beri jalǵasyp kele jatqan teris úrdis.
«Sonyń kesirinen eleýli kemshilikter bolyp jatady. Buǵan qosa, ulttyq múddeni qorǵaıtyn kezde tıimdi jumys atqarylmaıdy. Mysaly, qazir Jaıyq ózeni tartylyp barady, Qazaqstannan joldaǵan júk Qytaı shekarasynda turyp qaldy. Bizdiń kásipkerlerimizdiń kórshi elderdiń naryǵyndaǵy múddesi oıdaǵydaı qorǵalmaı otyr. Osyndaı keleńsizdikter halyqtyń turmys sapasyna jáne kóńil-kúıine keri áser etedi», edi Qasym-Jomart Toqaev.