Mektepti bitirip, joǵary oqý ornyna joldama alǵan árbir túlek, tórt jyl aıaqtalǵan soń, oqyǵan mamandyǵy boıynsha ońtaıly jumys taba alamyn ba dep oılanatyny anyq. Taram-taram joldardan tańdaǵan mamandyǵyńa qaraı qyzmet tabyla qalsa jaqsy ǵoı. Áıtpese, joǵary bilimi bar jastardyń da jumyr basyn súıretip, jumys tappaı júrgenderi qanshama. Qaladan tálim men tájirıbe jınaqtap, «Dıplommen – aýylǵa» attanǵan azamattar da bar.
Olardy májbúrleý zańǵa da, zamanǵa da qarsy shyqqandyq shyǵar. Taldaý da, tańdaý da óz erkińde. Jany qalaǵan jumys tabylyp, jubaıy qarsy bolmaǵasyn Jansaıa da osy baǵdarlama arqyly Pavlodar oblysyna qaraı bet alǵan.
«Eki jyl astanadaǵy Eýrazııa ulttyq ýnıversıtetiniń «Qazaq tili men ádebıeti» mamandyǵy boıynsha magıstratýrany bitirip, qolyma dıplomymdy alyp, «Dıplommen – aýylǵa» baǵdarlamasy boıynsha Pavlodar oblysy Pavlodar aýdanynyń Lýgansk aýylyndaǵy Lýgansk jalpy orta bilim berý mektebine keldim. Mektep dırektory birden qushaq jaıa qarsy aldy. Dırektordyń oqý-tárbıe isi jónindegi orynbasary laýazymyna taǵaıyndady. Sondaı-aq qazaq tili men ádebıeti páninen 8-synyp oqýshylaryna sabaq júrgizip kelemin. «Dıplommen – aýylǵa» baǵdarlamasy jastardy yntalandyrý maqsatynda memleket tarapynan kótermeaqy men baspana alýǵa jeńildetilgen nesıe usynady», deıdi J.Sársenbaeva.
Sonymen qatar ol memlekettik qoldaý qarjylaı ǵana emes, rýhanı turǵydan demeý berýshilerdiń de baryn tilge tıek etti.
«Menimen birge osy jyly mektebimizge tórt jas maman jumysqa ornalasty. Bárimizde memleket tarapynan berilip jatqan kótermeaqyny bir aı ishinde aldyq. Aı saıyn aýdan ákimi jas mamandardy jınap, jaǵdaılaryn bilip otyrady. Aýylda jas mamandarǵa arnalǵan jataqhana bar. Jataqhanada barlyq jaǵdaılar (ystyq sý, sýyq sý, jýynatyn bólme, t.s.s.) jasalǵan. Mekteptiń kásipodaq bóliminiń tóraıymy Saltanat Orazbaıqyzy men bastaýysh synyp ádistemelik birlestiginiń jetekshisi Aınur Temirjanqyzy árdaıym biz sııaqty jas mamandarǵa qoldaý kórsetip, bilmegen tustarymyzdy aıtyp otyrady. Elbasy N.Á.Nazarbaev óz sózinde: «Qazir jumysty qaladan emes, aýyldan izdeý kerek. О́ıtkeni eldi daǵdarys kezinde asyraıtyn – aýyl. Al aýylda jumys bolý úshin, ol qalany asyraı alý úshin jeke sharýalardy, aýyl turǵyndaryn, shaǵyn sharýa qojalyqtaryn qaıta qaýymdastyryp, biriktirý qajet», degen edi. Rasynda da, ózderine qajetti bilimdi ıgergen búgingi jastar ony aýyldyń kórkeıýi úshin qoldansa, elimizdiń bolashaǵy jarqyn, al jastarymyzdyń eńbegi esh ketpes edi degen úmittemiz», deıdi bizdiń keıipkerimiz.
Jobaǵa jaýapty Ulttyq ekonomıka mınıstrligi ókilderine habarlasqanymyzda, 2021 jyly 4,5 myń mamanǵa turǵyn úı satyp alýǵa bıýdjettik kredıt berýge 20 mlrd teńge josparlanǵanyn jetkizdi.
«Dıplommen – aýylǵa» jobasynyń sheńberinde 100 AEK (291 700 teńge) birjolǵy kóterme járdemaqy jáne turǵyn úı satyp alý úshin 1 500 AEK-ten (4 375 500 teńge) aspaıtyn somada bıýdjettik kredıt túrinde áleýmettik qoldaý sharalary kózdeledi. 2021 jyly 4,5 myń mamanǵa turǵyn úı satyp alýǵa bıýdjettik kredıt berýge 20 mlrd teńge josparlanǵan. 2021 jyldyń 1 tamyzyndaǵy jaǵdaı boıynsha 2,6 myń mamanǵa 11,3 mlrd teńge somasynda bıýdjettik kredıt berildi. 2020 jyldyń shildesinde áleýmettik qoldaý sharalaryn alý úshin jobaǵa qatysýshylar tizimine aýyl, kent, aýyldyq okrýg ákimderi apparattarynyń memlekettik qyzmetshileri qosyldy. Áleýmettik qoldaý sharalary kóbinese aýyldyq okrýgter ákimderi apparattarynyń bas jáne jetekshi mamandaryna baǵdarlanǵan», delingen mınıstrliktiń málimetinde.
Elbasynyń 2007 jylǵy 5 naýryzdaǵy tapsyrmasyna sáıkes jobany iske asyrý aýyldyq eldi mekenderge jumys isteý jáne turý úshin kelgen áleýmettik sala mamandaryn qoldaýǵa baǵyttalǵan. Áleýmettik saladaǵy bilikti mamandardyń tapshylyǵy jáne aýyldyq jerlerde bilim berý, medısınalyq jáne ózge de áleýmettik qyzmetter sapasynyń qanaǵattanǵysyz bolýy atalǵan tapsyrmaǵa negiz boldy. 2021-2023 jyldarǵa arnalǵan respýblıkalyq bıýdjetti qalyptastyrý sheńberinde turǵyn úıge bıýdjettik kredıt túrinde áleýmettik qoldaý sharalaryn usynýǵa jyl saıyn 20 mlrd teńge josparlanǵan, bul rette óńirlerdiń qajettiligi shamamen 27 mlrd teńge. О́tken jyldan bastap jobaǵa aýyldyq (kenttik) okrýg ákimdikteriniń apparattarynda jumys isteıtin memlekettik qyzmetshiler engizildi, bul tıisinshe memlekettik bıýdjettiń shyǵys bóligin ulǵaıtady.
Aýdandyq mańyzy bar keıbir qalalardyń halyq sany, ekonomıka qurylymy boıynsha aýyldyq eldi mekenderden erekshelenbeıtinin eskere otyryp, olardyń mártebesin ózgertý qajettiligi týyndaıdy. Respýblıka kóleminde halyq sany boıynsha óz mártebesine sáıkes kelmeıtin 13 qala bar (Aqmola – 3, Aqtóbe – 2, Shyǵys Qazaqstan – 2, Qaraǵandy – 1, Qyzylorda – 1, Mańǵystaý – 1, Soltústik Qazaqstan – 3). Sonymen qatar Qazaqstan Respýblıkasynyń Prezıdenti Q.Toqaevtyń 2020 jylǵy 1 qyrkúıektegi Qazaqstan halqyna Joldaýyn iske asyrý sheńberinde Úkimet aýyldyq aýmaqtar men shaǵyn qalalar boıynsha ulttyq jobany pysyqtaýda. Ulttyq jobada áleýmettik jáne ınjenerlik ınfraqurylymdy keshendi jańǵyrtý, shaǵyn kredıt berýdi qosa alǵanda, kásipkerlikti memlekettik qoldaý, qala quraýshy kásiporyndardy qoldaý, shaǵyn qalalardaǵy turǵyn úı qurylysy, nátıjeli jumyspen qamtýdy qoldaý jáne shaǵyn qalalarǵa qonys aýdarýǵa járdemdesý jáne basqa da is-sharalar kózdeledi. Kórsetilgen sharalar ekonomıkanyń jańa sektorlaryn damytýǵa, shaǵyn qalalardan halyqtyń kóshi-qon aǵynyn azaıtýǵa, shaǵyn qalalar halqynyń ómir súrý sapasy men ál-aýqaty deńgeıiniń ósýine yqpal etetin bolady. Sondaı-aq atalǵan keshendi sharalar osy eldi mekenderdiń kadrlyq áleýetin kúsheıtýge de múmkindik beredi. Joǵaryda baıandalǵannyń negizinde aýdandyq mańyzy bar qalalarǵa jumys isteý jáne turý úshin keletin mamandarǵa áleýmettik qoldaý sharalaryn usyný máselesi Ulttyq jobany pysyqtaý barysynda qaralatyn bolady.
Bilimdi túlek bilikti mamanǵa aınalary anyq. Osy rette oqýyn aıaqtap, aýyldyń ahýalyn jaqsartýǵa at salysamyn dep attanǵan árbir jasqa qoldaý kórsetý jergilikti basshylardyń nazarynda bolýǵa tıis. Sonda ǵana maman tapshylyǵy sııaqty mańyzdy másele sheshileri sózsiz.