Dastarqan ústinde alqyzyl gúl, jemis-jıdek, qus qaýyrsyny tursa, jazýshynyń jumys isteıtin orny, bolmasa qonaq kútken úıdiń eskızi elesteıdi. Osy úsh detaldy ilikke alǵan sýretshi shyǵarmasynyń janry natıýrmort ekenin ańdaý op-ońaı. Sebebin kenep betindegi ashyq boıaýlardyń ózi-aq baıandap turǵandaı.
О́nerdiń kóptegen salasynda aty shyqqan sýretshi Fedor Tolstoıdyń kórkem týyndylary kórermendi ıllıýzorlyq kemeldiligimen, tańǵajaıyp ertegisimen jáne jyly nurymen baýrap alady. Onyń eń tanymal kartınalarynyń biri – «Gúlder, jemister, qustar».
Iá, keneptiń janry – natıýrmort. Bir-birimen úılespeıtin, bir qaraǵanda, dastarqan basyndaǵy ósimdik pen kishkentaı qustyń bir nysan sheńberine enýi qısynsyzdaý kórinýi múmkin. Tipti avtor jasandylyqqa barǵandaı kúıge túsesiz. Lakonık dızaındy shyny vaza men kóbelek kereǵar uǵym qalyptastyrady.
Sýy bar qarapaıym vazaǵa jaı ǵana julynǵan dala gúlderi salynǵan. Alma men júzimniń ıllıýstrasııasy, túrli tústi qyzyl jolaqtar, qyzǵylt gúl shoqtary jáne ashyq-sarǵysh gúl reńkteri – sýretshiniń jeke tanymdyq ıdeıasy. Aldymen kóktemdi eske túsiredi jáne oqyrmanǵa qýanysh syılaýǵa umtylady. Pisken jemis-jıdekter kompozısııany baıytyp tur. Almanyń qaq ortasynan ekige bólinýi mezgilderdiń baılanysyn kórsetedi.
Sýretshi dánder men alma massasyn muqııat qadaǵalaǵan. Jasyl almanyń ústine qonǵan shybyn jemistiń hosh ıisti ekenin ańǵartyp tur. Oǵan qosa Tolstoı birneshe sý tamshysyn beınelegen. Olar móp-móldir tańǵy shyqqa uqsaıdy.
Natıýrmorttyń búkil kompozısııasy aǵash ústel ústinde oryndalady. Fon – qońyrqaı aǵash beti. Qaraqat sol sáttiń balǵyndyǵyn baıqatady. Jap-jasyl japyraqtar áli sarǵaımaǵan. Júzim butaǵyna qonǵan ǵajaıyp kókshil qustyń qaýyrsyny qońyr túspen tamasha úılesedi. Qos kóbelek vals bılep júrgendeı.
Shynynda, qylqalam sheberi ártúrli zattardyń qosyndysynan kaleıdoskopııalyq shyǵarma jazyp shyqqan. Natıýrmort bizdi tabıǵattyń baılyǵyna tamsanýǵa shaqyrady.