Birikken Ulttar Uıymynyń Aýǵanstandaǵy ókili Debora Lıons eldiń «gýmanıtarlyq apattyń aldynda turǵanyn» aıtyp, halyqaralyq qoǵamdastyqty aýǵan halqyna qarjylyq qoldaý kórsetý joldaryn izdeýge shaqyrdy.
Debora Lıons Aýǵanstannyń 38 mıllıon halqynyń shamamen 60 paıyzy qysta ashtyqqa ushyraýy múmkin ekenin aıtady. Onyń sózine súıensek, elde azyq-túlik tapshy.
«Qazir aýǵan halqynan bas tartatyn ýaqyt emes. Aýǵan halqyn tastap ketý – tarıhı qatelik», dedi D.Lıons sársenbi kúni BUU-da ótken baspasóz máslıhatynda.
Lıons gýmanıtarlyq apattyń aldyn alýǵa bolatynyn jetkizdi. Onyń aıtýynsha, tamyz aıynda eldi basyp alǵan «Talıbanǵa» qarsy qarjylyq sanksııalar salý qajet. Halyqaralyq qoǵamdastyq qarajatty «Talıbannyń» ıelenip ketýine jol bermeýge tıis.
BUU ókiliniń aıtýynsha, sanksııa saldarynan ekonomıkanyń barlyq aspektisi álsiregen. «Talıban» basyp alǵannan keıin eldiń ishki jalpy ónimi 40 paıyzǵa qysqardy.
Halyqaralyq valıýta qory (HVQ) Batys qoldaıtyn úkimet qulap, «Talıban» bılikti basyp alǵan soń Aýǵanstanǵa bólingen 450 mıllıon dollarǵa jýyq qarajatty berýge tosqaýyl qoıdy. Aýǵanstan ortalyq bankiniń AQSh-ta saqtalǵan 9 mıllıard dollarlyq rezervi de buǵattaldy.