Kanadada nóser jaýyn men daýyl saldarynan ózender tasyp, biraz jerdi sý basyp qaldy. Sonyń saldarynan myńdaǵan adam úılerin tastap ketýge májbúr boldy.
Jol jabylyp qalǵandyqtan úılerinen shyǵa almaı qalǵandar da kóp. Birneshe qala tolyǵymen baılanyssyz qaldy. Balshyq pen kóshkin negizgi tas joldardyń bir bóligin qıratty. Brıtandyq Kolýmbııa shtatynyń premer-mınıstri sársenbide tótenshe jaǵdaı jarııalady. Áskerıler japa shekkenderge kómektesýge jiberildi.
Kanadadaǵy eń úlken Vankýver porty barlyq temirjol qatynasyn toqtatty. Al qalanyń Kanadanyń qalǵan bóligimen qatynasy úzilip qaldy. Qazirgi tańda kem degende bir adamnyń qaıtys bolǵany rastaldy, iz-túzsiz joǵalǵandar da jeterlik.
Bul aımaqqa qyrkúıekten beri erekshe mol jańbyr jaýdy. Meteorologter ony «daýyldar sherýi» dep ataıdy. Vashıngton shtatyndaǵy Bellıngemde senbi men dúısenbi aralyǵynda ortasha eseppen qarasha aıynda túsetin jaýynnan kóp jańbyr jaýǵan.
Kanadanyń qarýly kúshteri evakýasııa jumystaryna kómektesý úshin qatty zardap shekken aımaqtarǵa 4000 ásker jiberdi. Prınston qalasynyń bıligi taza sý men tabıǵı gazdyń jetispeýshiligine baılanysty evakýasııa týraly eskertý jarııalady.
Kanadamen shekarada ornalasqan AQSh-tyń Vashıngton shtatyndaǵy shaǵyn qala Sýmasty da jartylaı sý basty. Mundaǵy sý tasqyny úılerdiń tórtten úsh bóligin basyp qaldy. Shamamen 500-ge jýyq qutqarýshy jumyldyrylyp, evakýasııalaý jumystary júrgizilip jatyr.