Taıaýda Hromtaý aýdanynda mal urlyǵymen aınalysyp júrgen eki top ustaldy. Qylmysqa kúdiktiler elsizde jaıylyp júrgen iri qara, jylqylardy soıyp, etterin Aqtóbe qalasynda ótkizip otyrǵan. Mal urlyǵymen aınalysýshylar negizinen óriste baqylaýsyz jaıylyp júrgen, ıeleri jıi baqylaı bermeıtin sıyr, jylqylardy urlap kelgen.
Kúni keshe ǵana Aqjar aýylynyń tusynda «VAZ-21150» jeńil kóligimen mal urlaǵan úsh adam ustaldy. Aýyl shetinen quıyndaı uıtqyp avtokólik jolyna shyqqan jeńil kólikti baıqap qalǵan aýyl turǵyndary ýchaskelik polıseımen birge qýyp jetip, toqtatqan. Oblys ortalyǵyna baratyn tasjolda ustalǵan kóliktiń júk salǵyshynan qapqa salynǵan, jańa soıylǵan iri qara eti tabyldy. Mal etine veterınarlyq qujat ta joq bolǵandyqtan ýchaskelik polıseı dereý oblystyq Polısııa departamentine habarlaǵan. Kólikte bolǵan úsh er adam Alǵa aýdanynyń Tamdy eldi mekeniniń tusynda jaıylyp júrgen sıyrlardyń birin ustap alyp, soıyp úlgergenin jasyrmady. Aqtóbeden jetken jedel top mal urlyǵymen aınalysqan úsh aqtóbelikti tutqyndap, Qylmystyq Kodekstiń 188-1-baby 2-tarmaǵymen, «Mal urlyǵy» boıynsha qylmystyq is qozǵady.
Aqtóbe oblystyq Polısııa departamentiniń mamandary aýyl turǵyndarynan kúz kezinde maldy óriske baqylaýsyz jibermeýdi eskertedi. О́ıtkeni jyl saıyn qarasha aıynda mal urlyǵy kúrt kóbeıse, oǵan aýyl turǵyndarynyń maldy baqylaýsyz jiberýi de sebepshi bolady. Onyń ústine úlken avtókólik joldaryna shyǵyp ketken iri qara, jylqylardy kólik qaǵyp ketken jaǵdaılar da jıi ushyrasyp jatady.
Hromtaý aýdanynda baqylaýsyz júrgen tórt túlikti ıeleri tabylǵansha qamap ustaıtyn 15 alań daıyndaldy. Bul osy jumysty júıeli jolǵa qoımaǵan keıbir eldi meken turǵyndaryn jaýapkershilikke tartýdyń tóte joly bolyp tur. О́ıtkeni osyǵan deıin Hromtaý aýdandyq ishki ister bóliminiń qyzmetkerleri turǵyndarǵa maldaryn baqylaýsyz jibermeýdi birneshe ret eskertse de, kópshiligi qulaq aspaı kelgen bolatyn. Al osy aýdannyń mal baǵý isi júıeli túrde uıymdastyrylǵan úsh eldi mekeninde urlyq tirkelgen joq.
Aqtóbe oblysy