Indet belgisi baıqalǵaly beri oblysta koronavırýs ınfeksııasyn juqtyrǵan 19 170 jaǵdaı tirkelipti. Ásirese, osy jyly boıynan vırýs tabylǵandar kóp. Byltyrǵy osy kezeńmen salystyrǵanda bıyl aýrýshańdyq kórsetkishi 3 esege ulǵaıǵan. Degenmen sońǵy 2 aıda indetke shaldyqqandar qatarynyń azaıǵany baıqalady.
Mysaly, 16 qarasha kúni oblysta koronavırýs ınfeksııasyn 7 turǵyn juqtyrǵany tirkelip otyr. Onyń altaýy ekpe saldyrmaǵandar. Aýyrǵandardyń kóbi vırýs juqtyrǵan adammen qarym-qatynasta bolǵandar arasynan shyǵyp otyr.
Osy kúni oblys «jasyl aımaqta» tur. Biraq mamandar turǵyndardyń osyǵan maldanyp, qaýipsizdik sharalaryn umytyp ketpeýi kerektigin jıi aıtady. Indettiń taralýynyń aldyn alý úshin karantın talaptarynyń saqtalýyna monıtorıng júrgizý tolastaǵan emes. Jyl basynan beri 15 826 nysanǵa reıd jasaldy. Onyń barysynda karantın talaptaryn buzýdyń 802 deregi anyqtalyp, 52 mln teńgeden astam ákimshilik aıyppul salyndy.
– Oblys kóleminde Ashyq júıesi boıynsha oqshaýlaný tártibin buzǵan 1 150 azamat anyqtaldy. Olardyń 741-i «qyzyl», 409-y «sary» statýsta bolǵan. Jan-jaǵyna indet juqtyratynyn bile tura, karantın talabyn saqtamaǵan «qyzyl» statýstaǵylardyń 246-syna ákimshilik hattama toltyrylyp, olar 10 mln teńgeden astam aıyppul arqalady, – deıdi oblystyq sanıtarlyq-epıdemııalyq baqylaý departamenti basshysynyń orynbasary Álııa Ábdiqaıymova.
Vaksınalaý kórsetkishi boıynsha Qyzylorda oblysy respýblıkada tórtinshi orynda tur. Aımaqqa «Komırnatı» vaksınasynyń 23 400 dozasy keldi, alda ony 97 myńǵa jetkizý josparlanyp otyr. Alǵashqy lekte bul vaksına 72 adamǵa egildi.
Qyzylorda oblysy