Áıgili Goal.com basylymynyń oqyrmandary Argentına quramasy men Fransııanyń PSJ klýbynyń shabýylshysy Lıonel Messıdi 2021 jyldyń úzdik fýtbolshysy dep tanydy.
Saıt oqyrmandary arasynda júrgizilgen saýaldama nátıjesi boıynsha Messı Portýgalııa jáne «Manchester Iýnaıted» shabýylshysy Krıshtıaný Ronaldý men «Bavarııa» fýtbolshysy Robert Levandovskıdi (Polsha) artqa tastap, eń kóp daýyspen birinshi orynǵa ıe bolǵan. Úzdik bestikti Mohamed Salah («Lıverpýl», Mysyr) jáne Kılıan Mbappe (PSJ, Fransııa) túıindedi. Odan keıingi oryndarǵa Erlıng Holann («Borýssııa», Norvegııa), Karım Benzema («Real» Fransııa), Ngolo Kante («Chelsı», Fransııa), Kevın De Breıne («Manchester Sıtı», Belgııa) jáne Neımar (PSJ, Brazılııa) jaıǵasqan. Daýys berýge 14 mıllıon oqyrman qatysypty.
Aıta keteıik, osy aıdyń basynda RTP basylymy bıylǵy «Altyn dopty» Lıonel Messı jeńip alǵanyn habarlaǵan edi. Derekkózdiń málimeti boıynsha, jyl saıyn bedeldi fýtbol syılyǵyn tabystaıtyn France Football jýrnalynyń ókilderi PSJ oıynshysymen habarlasyp, «Altyn dop» syılyǵyn jetinshi ret jeńip alýyna baılanysty suhbat alyp ta úlgergen.
Lıonel Messı bıyl Argentına ulttyq quramasymen birge Ońtústik Amerıka kýbogynda jeńimpaz atanyp, «Barselona» sapynda Ispanııa kýbogyn ıelengen edi.