Elordada halyq arasynda «Qazaqtyń qońyry» atanǵan Qazaqstannyń eńbek sińirgen ártisi, ánshi Nurlan О́nerbaevtyń «Aıtylmaǵan bir ánim bar» atty shyǵarmashylyq keshi ótti.
Nur-Sultan qalasy ákimdiginiń qoldaýymen ótken keshke Mýzykalyq jas kórermender teatrynyń ártisteri men Qazaqstannyń eńbek sińirgen qaıratkerleri Saıat Medeýov, Toqtar Serik pen Beıbit Seıdýáli, «Slavıan bazary-2021» halyqaralyq festıvaliniń Gran-prı ıegeri Rýhııa Baıdúkenova, Junior Eurovision-2020 halyqaralyq baıqaýynyń laýreaty Erjan Maksım, «Slavıan bazary-2019» halyqaralyq festıvaliniń Gran-prı ıegeri Ádilhan Makın, Qazaqstannyń eńbek sińirgen qaıratkerleri Qanat-Sveta Aıtbaevtar, t.b. óner ıeleri qatysyp, kesh ıesiniń oryndaýyndaǵy ánderdi shyrqady.
Shyǵarmashylyq kesh barysynda beınearhıvter kórsetilip, Mýzykalyq jas kórermen teatrynyń ártisteri teatrlandyrylǵan kórinis arqyly kesh ıesiniń ánshiligimen qosa akterlik óner salasyna da qosqan úlesin, sonymen qatar qazaq radıosy, telearnalardyń altyn qorlaryndaǵy eńbekterin kórsetti.