Nur-Sultan, Almaty jáne Shymkent qalalarynyń jumysshy jastaryna bıyl úsh myńǵa jýyq páter beriledi. Bul týraly QR Premer-Mınıstriniń orynbasary Eraly Toǵjanov depýtattyq saýalǵa bergen jaýabynda aıtty, dep habarlaıdy Egemen.kz.
«Úkimettiń 2019 jylǵy 20 qańtardaǵy №27 qaýlysymen bekitilgen Jastar jylyn ótkizýdiń jol kartasy aıasynda Nur-Sultan, Almaty, Shymkent qalalarynda jas mamandar úshin úsh myńǵa jýyq jaldamaly páter salý kózdelgen. Eki jyl ishinde osy qalalarda jumys isteıtin jastarǵa 4 354 páter berildi. Bıyl taǵy úsh myńǵa jýyq páter beriledi. Aqparat jáne qoǵamdyq damý mınıstrliginiń buıryǵymen jumys isteıtin jastar úshin satyp alý quqyǵynsyz jalǵa turǵyn úı berý qaǵıdalary bekitildi. Olarǵa sáıkes, jas azamattar turaqty jumys orny bolýy jáne menshiginde jyljymaıtyn múlki bolmaýy tıis», delingen vıse-premerdiń jaýabynda.
Satyp alý quqyǵynsyz jalǵa beriletin turǵyn úı bes jylǵa beriledi.
Jobanyń negizgi maqsaty - jastar turǵyn úı satyp alýǵa bastapqy jarnany jınaý úshin jaǵdaı jasaý.
«Jalǵa beriletin turǵyn úı alǵan azamat bes jyl ishinde ıpoteka boıynsha turǵyn úı satyp alý úshin bastapqy jarna somasyn jınaýy tıis. Bul úshin kirister keminde 40 aılyq eseptik kórsetkish (116 680 teńge) bolýy tıis dep kózdelgen. Bul shek 25 AEK-ke (72 925 teńge) deıin tómendegen kezde satyp alýshy bastapqy jarna úshin qajetti somany jınaı almaıtyn táýekel týyndaýy múmkin», dep habarlady E.Toǵjanov.