Memleket basshysy Qasym-Jomart Toqaev Almaty qalasyndaǵy ekinshi jylý elektr stansııasyna bardy, dep habarlaıdy Egemen.kz Aqordaǵa silteme jasap.
Qasym-Jomart Toqaev Aıtqalı Jaqutov atyndaǵy ekinshi jylý elektr stansııasynda boldy. Prezıdent stansııa aýmaǵynda jańadan salynatyn qýaty 600 MVt bolatyn bý-gaz qondyrǵysynyń qurylysyna daıyndyq jumystarymen tanysty.
«Samuryq-Qazyna» UÁQ» AQ basqarma tóraǵasy Almasadam Sátqalıev Prezıdentke qalalyq energetıka keshenin jańǵyrtý nátıjesinde aýaǵa taraıtyn zııandy qaldyqtar 2026 jylǵa qaraı jylyna 50,4 myń tonnadan 6,7 myń tonnaǵa deıin azaıatyny týraly málimet berdi. Sodan keıin energııa keshenine aýqymdy jańǵyrtý jumystarynyń bastalǵanyn bildiretin estelik kapsýlasyn qoıýdyń saltanatty rásimi ótti. Prezıdent sharaǵa qatysýshylardyń aldynda sóılegen sózinde jańa qondyrǵynyń qurylysy búkil qalalyq energetıka keshenin jańǵyrtý jumystarynyń bastalǵanyn bildiretinin atap ótti.
«Aldaǵy bes jylda Almaty men Almaty aglomerasııasy turaqty energııamen jáne jylýmen qamtamasyz etiledi. Belgilengen jospardy júzege asyrý turǵysynan alǵanda, Memleket basshysynyń ózi osy kapsýlany qalap, tıisti jumystardy bastap bergeni úlken jaýapkershilik júkteıdi», dedi Prezıdent.
Osyǵan baılanysty Memleket basshysy «Samuryq-Qazyna» qorynyń tóraǵasy men qala basshylyǵyna, sondaı-aq JEO qyzmetkerlerine barlyq jumysty merziminde jáne sapaly oryndaýǵa shaqyrdy. Sonymen qatar atalǵan óńir elimizdiń negizgi ekonomıkalyq ortalyqtarynyń biri bolǵandyqtan, bul jumystardyń asa mańyzdy ekenin atap ótti.
«Eń bastysy, biz ekologııany jaqsartyp, turǵyndardy taza aýamen qamtamasyz etemiz. Men úshin bul asa mańyzdy. Meniń tapsyrmam boıynsha Úkimet qalanyń aýasyn tazartý úshin qajetti sharalardy qabyldaıdy dep almatylyqtarǵa ýáde berdim. Shyn máninde, birneshe jyl boıy qala turǵyndary ekologııanyń lastanýynan zardap shegip keldi. Biz bul máseleni túbegeıli sheshýimiz kerek», dedi Qasym-Jomart Toqaev.
Memleket basshysy jobanyń el Táýelsizdiginiń 30 jyldyǵy qarsańynda júzege asyryla bastaýynyń sımvoldyq máni bar ekenin aıtty. « Bul bastama Almatynyń jasyl ári taza qala degen burynǵy mártebesin qaıtaryp, turǵyndardyń ómir súrý sapasyn arttyratynyna senimdimin», dedi Prezıdent. Shara sońynda Qasym-Jomart Toqaev JEO-2 jumysshylarymen áńgimelesip, olardy búgingi aıtýly oqıǵamen quttyqtady.