Fýtboldan Almatydaǵy Ortalyq stadıonda ótken Qazaqstan kýbogynyń jartylaı fınalynda jergilikti «Qaırat» Nur-Sultannyń «Astanasymen» kúsh synasty.
«Astana Arenada» ótken alǵashqy kezdesýde qonaqtar alań ıeleriniń qaqpasyna jaýapsyz úsh gol salǵan edi. Bul joly da «Qaırattyń» mereıi ústem boldy. Shyny kerek, birinshi taım súreńsiz ótti. Qos komanda ara-tura shabýyldaǵanymen, olardyń bul áreketterinen eshteńe ónbedi. Oıynshylardyń tepken doptary kóp jaǵdaıda qısyq ketse, keıbir tusta qaqpashylardyń ońaı oljasyna aınaldy. Esesine úzilisten keıin báseke jandandy. 65-mınýtta Meırambek Qalmyrza Joao Paýlo tepken dopty keri qaıtaramyn dep óz qaqpasyna baǵyttady. 81-mınýtta Hose Kante buryshtamadan berilgen dopty torda týlatsa, 87-mınýtta Vagner Lav kezdesýdiń sońǵy núktesin qoıdy. Esep – 3:0. Osylaısha, almatylyqtar fınalǵa shyqty.
Taǵy bir aıta keterligi, oıynnyń 70-mınýtynda «Qaırattyń» sapyndaǵy serbııalyq legıoner Rade Dýgalıch alańnan qýylsa, 80-mınýtta «Astananyń» jartylaı qorǵaýshysy Meırambek Qalmyrzaǵa da qyzyl qaǵaz kórsetildi.