Akademık E.Bóketov atyndaǵy Qaraǵandy ýnıversıtetiniń bazasynda jaratylystaný-matematıkalyq baǵyt boıynsha ótken XIV Prezıdenttik olımpıada aıasyndaǵy respýblıkalyq kezeńniń qorytyndy týry ótti.
Elimiz boıynsha 11-12-synyptardyń 182 oqýshysy baq synaǵan bilim báıgesinde Qaraǵandy qalasyndaǵy Nazarbaev zııatkerlik mektebiniń oqýshysy Álisher Kabardııadı jeńimpaz atanyp, I dárejeli dıplommen jáne altyn medalmen marapattaldy.
Daryndy jas olımpıadanyń irikteý týrynda da, qorytyndy kezeńinde de joǵary akademııalyq bilim kórsetken.
Álisher Kabardııadı olımpıadanyń dostyq atmosferasy unaǵanyn aıtady.
– Árıne, dodada básekelestik rýh boldy. Kórsetken nátıjeme kóńilim toldy, biraq áli de bolsa alǵa jyljý kerek, – deıdi 12-synyp oqýshysy.
Tereń bilimimen kózge túsken órenge qazirdiń ózinde Satbayev University men S.О́tebaev atyndaǵy Atyraý Munaı jáne gaz ýnıversıteti granttaryn usynypty.
Sondaı-aq atalǵan bilim jarysynda Qaraǵandydaǵy №1 «Bilim-ınnovasııa» lıseı-ınternatynyń 11-synyp oqýshysy О́mir Baıbosynov ekinshi júldege ıe boldy.
Eske sala ketsek, elimizde jaratylystaný-matematıkalyq sıkl pánderi boıynsha Prezıdenttik olımpıada 2008 jyldan beri ótkizilip keledi.
QARAǴANDY