Shymkentte «Pánaralyq nevrologııa» atty halyqaralyq konferensııa ótti. Oǵan AQSh, Germanııa, Reseı, О́zbekstan jáne elimizdiń aımaqtarynan kelgen nevrologtar, neırogenetıkter men neırofızıologtar qatysty, dep jazady Egemen.kz Shymkent qalasy ákimdiginiń baspasóz qyzmetine silteme jasap.
Konferensııa barysynda bilikti mamandar júıke júıesi aýrýlarynyń taralýy, olardy emdeý jáne qalpyna keltirý sharalary boıynsha tájirıbe almasty.
Elimizde sońǵy jyldary ınsýlt ortalyqtary kóptep ashylyp jatyr. Búginde onyń sany jetpiske jetti. Úshinshi megapolıs sanalatyn Shymkentte 3 ınsýlt ortalyǵy bar. Mundaı ortalyqtardyń ashylýy ınsýltten keletin ólimniń sanyn azaıtty deıdi mamandar.
«Jyl sanap elimizde ınsýlt ortalyǵynyń kóbeıýi aýrýdan keletin ólimniń sanyn tómendetti. Degenmen, bul syrqattan keletin qaýip áli de óte joǵary. Álemdi jaılaǵan pandemııa kezinde bizdegi telemedısına salasy birshama damydy. Telemedısına arqyly bilikti mamandarymyz aýyr jaǵdaıdaǵy naýqastardy emdeý joldary boıynsha tájirıbe bólisip, múmkindigimiz artty», deıdi elimizdiń bas nevrologi Sáýle Toǵysbekova.
Sheteldik mamandar qazaqstandyq áriptesterine halyqaralyq tájirıbedegi emdeý hattamasy men biliktilikti jetildiretin tegin jobalarmen bólisti. COVID-19 ınfeksııasynyń taralýy, onyń asqynýynan paıda bolatyn nevrologııalyq aýrýlar týraly da pikir almasty. Eki kúnge sozylǵan jıynda qyryqqa jýyq maman baıandama oqydy. Olardyń emdeý jumystary jóninde túrli maqalalar jarııalandy.