Bul týraly Bilim jáne ǵylym mınıstri Ashat Aımaǵambetov Qazaqstannyń X Azamattyq forýmyna joldaǵan beıneúndeýinde aıtty, dep jazady Egemen.kz.
«ÚEU bilim berý júıesin damytýda jáne ásirese balalardyń quqyqtaryn qorǵaýda mańyzdy ról atqarady. Uıym usynǵan bastamalar jańa jobalardy júzege asyrýǵa, sondaı-aq bizdiń saladaǵy ózekti máselelerdi sheshýge kómektesedi», deıdi Ashat Aımaǵambetov.
Mınıstr balalardyń quqyqtaryn qorǵaý salasynda júzege asyrylyp jatqan birlesken jobalardy erekshe atap ótti.
«Mysaly, Analar úıi jobasy. Ol bizge balalar úıleriniń sanyn aıtarlyqtaı qysqartyp, otbasynda tárbıelenetin balalardyń balamaly sheshimin engizýge kómektesti. Búginde memlekettik jáne úkimettik emes uıymdardyń birlesken jumysynyń arqasynda 18 myńnan astam jetim bala otbasynda tárbıelenýde. Al qazirdiń ózinde ondaǵan balalar úıi jabyldy. Sonymen birge uıym erekshe bilim berý qajettilikteri bar balalar úshin ınklıýzıvti qoǵamdy jáne qolaıly ortany qurýǵa qatysady. «Dara», «Bolashaq», «Asyl mıras» jáne basqa da qorlarmen yntymaqtastyq aıasynda biz ondaǵan resýrstyq ortalyq pen ınklıýzııa kabınetin ashtyq», dep atap ótti Aımaǵambetov.
Mınıstr qoǵam qaıratkerleriniń usynysymen barlyq mektepte assıstent laýazymyn engizilgenin aıtty.
«Qazir elimizdiń barlyq aımaǵynda 700-den astam osyndaı maman erekshe qajettilikteri bar balalarmen jumys isteıdi. Aýtızm ortalyqtaryn qurý boıynsha «Asyl Mıras» jobasyn da atap ótkim keledi. Olar Bilim jáne ǵylym mınıstrligi bekitken arnaıy bilim berý uıymdarynyń tizimine endi. Mınıstrlik aldaǵy ýaqytta da ashyqtyq pen ózara tıimdi yntymaqtastyq saıasatyn ustanýdy jalǵastyrady», dep aıtty Bilim mınıstri.