Osy jyldyń tamyz aıynda el bıligine kelgen «Talıban» qozǵalysy eldegi birqatar telebaǵdarlamaǵa, sonyń ishinde áıelder qatysatyn teleónimderdi kórsetýge tyıym saldy, dep jazady Egemen.kz.
«RIA Novostıdiń» jazýynsha, Aýǵanstandaǵy barlyq telearnalar óz baǵdarlamalarynyń sharıǵat pen moraldyq normalarǵa qaıshy kelmeýin, oıyn-saýyq baǵdarlamalarynyń dinı turǵyda durys bolýyn, jýrnalıst áıelderdiń oramal taǵyp júrýin baqylaýy kerek.
«Áıelder qatysatyn telehıkaıalardy kórsetýge tyıym salynady. Sondaı-aq erler nemese áıelder jartylaı jalańash keıipte kórinetin fılmder men klıpterdi kórsetýge tyıym salynady», delingen eldiń aqparat salasyna jaýapty mınıstrligi taratqan habarlamada.
Buǵan deıin Aýǵanstannyń jańa bıligi teleradıo jumysyna ózgerister engizip úlgergen bolatyn. Ol ózgeriske saı Aýǵanstan parlamenti eldegi basty teleradıokompanııanyń ataýyn «ál-Hıdjra» dep ózgertip, onda tek ıslamdyq taqyryptardy qamtıtyn baǵdarlamalardy kórsete bastaǵan.