Mańǵystaý oblysynyń Aqtaý qalasynda bıyl alımentti ýaqytyly esep-shotqa aýdarmaǵan 13 esepshige aıyppul salyndy. Bul týraly «Habar» telearnasy habarlady.
Sot oryndaýshylarynyń aıtýynsha, esepshilerdiń birqatary óz jumyskerlerin jasyrǵan. Tipti olardyń jumystan shyǵyp ketkenin tıisti orynǵa habarlamaǵan kórinedi. Jalpy, Aqtaý qalasynda týǵan balasynan bezip, alıment tólemeı júrgen 5 myńǵa jýyq áke bar eken. Sonyń saldarynan beıkúná sábıler zardap shegýde. Al ótken jyly boryshkerlerdiń jalaqysynan aı saıyn alıment tólemderin ustaýǵa qulyqsyzdyq tanytqan 40 esepshi ákimshilik jaýapkershilikke tartylǵan.
«Keden departamentiniń esep bólimi boryshkerdiń jumystan shyǵyp ketkenin sot oryndaýshylaryna habarlamaǵan jáne atqarý qujatyn tıisti orynǵa bir aı merzim ishinde qaıtarmaǵan. Osyǵan baılanysty esep bólimindegi jaýapty tulǵa ákimshilik jaýapkershilikke tartyldy», - deıdi oblystyq sot aktilerin oryndaý departamenti alıment óndirý bóliminiń basshysy Móldir Qýanova.
Ámirhan Almaǵanbetov.
Derekkóz: «Habar» telearnasy.
Foto: 1Tv.ru.