Qulaqtan kirgen qudiretti mýzyka týyndylary deneni shymyrlatyp, alpys eki tamyrǵa rýh júgirtkendeı tebirenesiń. Ult aspaptarynyń shertolǵaq shanaǵynan shymyr-shymyr notalar túlegende at tuıaǵynan súrdekke aınalǵan jolda jortýylda kún keshken uly babalardyń murat-maqsaty men asqaq armany bolǵan búgingi berekeli shaqta besik terbetken qazaq ultynyń tektiligi qylań beredi. Mine, osyndaı san tolqynysqa jetelegen belgili ánshi, Qazaqkonsert solısi Erbolat Shaldybekovtiń «Tógeıin jyrdy halqyma» atty jańa konsertiniń kýási boldyq.
Tyńdarmannyń kóńilin kók teńizdeı tolqytqan, mýzyka óneriniń jaýhar týyndylary oryndalǵan keremet kesh Qazaqkonsert sahnasynda ótti. Jetisý ánshilik-jyrshylyq mektebiniń jarqyn ókili Erbolat Shaldybekov dástúrli ánge shólirkegen jurttyń shólin bir basty.
Kóńildiń kıeli pernesin dóp basyp, jan saraıyn jadyratatyn saz óneriniń sıqyryna jıi eltip ketesiń. Qansha ýaqyt tirshilik tepeńimen júrseń de, babalardyń ómirsheń týyndylary kókeıińde kúmbirlep qoıa beredi. Kesh ıesiniń qýanyshyna qoldaý kórsetken «Astana sazy» memlekettik folklorlyq ansambli sahnada bebeýletkende kóńil tolqıdy. Sahnadan ushqan tamyljyǵan móldir týyndylar, asqaq rýhty kúıler jadyńda jańǵyrsa, jer-álemge syımaıtyndaı kúıge túsesiń. Sonda baryp shynaıy ónerge degen ishki sezimiń bekı túsedi.
Shyndyǵynda Erbolat Shaldybekovtiń repertýaryndaǵy árbir týyndyny tolqı tyńdamaý múmkin emes. Attyń shabysy, sýdyń aǵysynan bastap qazaqy qandy tasytar nebir sazdy ón boıyna jınaǵan uly kúıler men asqaq mýzykalardy joǵary deńgeıde oryndaıtyn óner ıesi búginge deıin talaı asýdy baǵyndyryp, shyǵarmashylyqtyń jemisti jolyn tarıhı súrdekke aınaldyrdy.
Shara barysynda kúlli qazaq tyńdarmandarynyń súıispenshiligine, qurmet-qoshemetine bólenip júrgen Janǵalı Júzbaı, Erlan Rysqalı, Ardaq Balajanova, Klara Tólenbaeva, Elbol Qýanbek syndy kesh qonaqtary halyqtyń ystyq yqylasyna ıe bolyp, sahnany dúbirge bóledi.
Kesh sońynda Jambyl Jabaevtyń jyrlary men Jetisý óńiriniń ánderinen jan dúnıesi jadyrap, rýhanı lázzat alǵan kórermen kesh ıesine alǵysyn aıtyp, tarqasty.