Aqtóbe oblysynda juqpaly mal aýrýy tarap jatyr, dep habarlaıdy Egemen.kz.
Bul týraly KTK telearnasy málim etti.
Alǵa aýdanynda iri qaranyń silekeıi aǵyp qyzýy kóterilse, býyny álsiregen qoı-eshkini júrgizbeı tastaıdy. Biraq bul indetten malǵa da, adamǵa da qaýip joq deıdi mamandar.
Alǵa aýdanyna qarasty Bestamaq aýylynyń turǵyndary alańdaýly. Qorasyndaǵy qoı-eshkisinen bastap, iri qarasy belgisiz indetke shaldyqqan. Buryn aqyrdaǵy jem-shópten bas almaıtyn tórt túligi bir jutym sý da ishpeı qalypty.
«Aýzynan sý shubyryp turady. Shóp jemeıdi. Jem jemeıdi. Sý ishpeıdi. Yńyrsyp tura beredi. Áýelde sıyrdy aýsyl dep qoryqtyq. Bári de solaı dedi. Qoıǵa aıaqqa túsedi, sıyrdyń aýzy sondaı bolady», dedi Bestamaq aýylynyń turǵyny Ahmadın Muqashov.
Belgisiz keselden tek qana iri qara mal emes, usaq maldar da aýyrǵan. Ásirese qoıdyń aldyńǵy eki aıaǵy búktetilip, eńbektep júre almaı qalǵan.
Bul indetten Bestamaq aýlynda ázirge 7 bas mal ólgen. Degenmen turǵyndar óz betinshe elden estigen em-domyn jasap jatyr. Keseldiń kesirinen mal ustaýdan qorqyp qalǵanyn jasyrmaıdy.
Jergilikti sheneýnikter bul keselden malǵa da, adamǵa da qaýip joq dep otyr. Aýrý belgileri aýsylǵa uqsaǵanymen, ondaı qaýipti emes dep sabyrǵa shaqyrady.
«Adam densaýlyǵyna tikeleı áser etetin, ıá bolmasa, taǵy da bir juqpaly máseleler boıynsha eshqandaı da fakt tirkelgen joq. Rastalǵan joq. Veterınarlyq ulttyq ortalyqqa jiberip, synamanyń qorytyndysy boıynsha bul ınfeksııalyq rınotraheıt aýrýy dep anyqtalǵan bolatyn», dedi Alǵa aýdany ákiminiń orynbasary Meıirhan Ermaǵanbetov.
Bul aýrý Alǵa aýdanynyń Bestamaǵynan bólek, kórshi eki aýylda anyqtaldy. Indet maldan malǵa juǵady. Rınotraheıt juqtyrǵan mal tól tastaıdy eken. Saýyndy sıyr bolsa, súti qashady deıdi mamandar. Al etin aýrý jazylǵan soń eki aptadan keıin jeýge bolady.