Qazaqstan Reseımen «Spýtnık Laıt» vaksınasyn jetkizý týraly kelissózder júrgizýde. Bul týraly QR Densaýlyq saqtaý mınıstri Alekseı Soı málim etti, dep habarlaıdy Egemen.kz.
«Biz bul máseleni qarastyryp jatyrmyz. Reseılik áriptesterimizden «Spýtnık Laıt» vaksınasyn jetkizý múmkindigi týraly aqparat suraldy. Bul, negizinen «Spýtnık V», tek jeke birinshi komponent», dedi Alekseı Soı Úkimet otyrysy aıasynda.
Mınıstr jetkizý merzimi pysyqtalyp jatqanyn aıtty.
Alekseı Soı Qaraǵandy farmasevtıkalyq kesheni «Spýtnık Laıt» shyǵarady ma degen suraqqa jaýap berdi.
«Iá, onda tájirıbeli partııa shyǵaryldy. Qazir óndiris máselesi de pysyqtalýda. Meniń bilýimshe, alǵashqy synaq partııalary sátti ótti, olar ózderiniń málimdelgen talaptarǵa sáıkestigin rastady», dedi mınıstr.
Sondaı-aq Alekseı Soı vaksınanyń atalǵan túrin qandaı kólemde satyp alýǵa nıetti ekenin aıtty.
«Biz kommersııalyq usynys alǵannan keıin, qansha vaksına jetkizýge bolatyndyǵyn talqylaımyz. Qazirgi ýaqytta bizge úlken kólem qajet emes. Jyl sońyna deıin bizde revaksınasııa úshin vaksınalar jetkilikti, olar el ishinde bar», dedi Densaýlyq saqtaý mınıstrliginiń basshysy.
Alekseı Soı halyqtyń negizgi bóliginde kelesi jyly 6-9 aıǵa egý merzimi aıaqtalatynyn túsindirdi. Sondyqtan Qazaqstanǵa «Spýtnık Laıt» vaksınasyn jetkizý 2022 jylǵa josparlanǵan.