Qytaıda stýdent Gonkongtyń táýelsizdigine shaqyrǵany úshin merzimge ıe boldy. Iá, sot Gonkong belsendisin «separatızmge shaqyrǵany úshin» degen aıyppen úkim shyǵaryp, temir torǵa toǵytty, dep habarlaıdy Egemen.kz.
Gonkong soty 20 jastaǵy belsendi stýdent Tonı Chýndi «separatızmge jáne zańsyz tabys tabýǵa shaqyrǵany úshin» degen aıyppen úsh jyl jeti aıǵa bas bostandyǵynan aıyrdy, ol jańa ulttyq qaýipsizdik zańyn buzǵany úshin Gonkongtyń túrmede otyrǵan eń jas turǵyny atandy.
«Tonı Chýn ótken jyldyń 1 shildesi men 27 qazany aralyǵynda Gonkongty Qytaıdan bólýge nemese qalanyń konstıtýsııalyq mártebesin zańsyz ózgertýge umtyldy», delingen aıyptaýshy taraptyń jazbasynda. 2016 jyly Tonı Chýn Gonkongtyń Qytaıdan táýelsiz bolýyn qalap, Studentlocalism qozǵalysyn qurdy. «2020 jyldyń maýsym aıynda, ıaǵnı, Ulttyq qaýipsizdik týraly zań qabyldanǵan kúni qozǵalys resmı túrde taratyldy, alaıda aıyptaý boıynsha Tonı Chýn separatıstik qyzmetpen aınalysýdy jalǵastyrdy», deıdi aıyptaýshylar.
Sonymen qatar, aıyptaýshylardyń sózine sensek, stýdent elektrondy ámııandar arqyly separatıstik qyzmetti qarjylandyrý úshin zańsyz aqsha jınaýmen aınalysqan.
Tonı Chýn Gonkongtyń Ulttyq qaýipsizdik týraly jańa zańyn buzǵany úshin túrmege jabylǵan úshinshi turǵyn boldy. Osy jyldyń shildesinde sot polısııa tobyna motosıklmen basyp kirgen 24 jastaǵy belsendini toǵyz jylǵa sottady. Qarasha aıynyń basynda 31 jastaǵy belsendi separatızmge shaqyrǵany úshin bes jyl toǵyz aıǵa bas bostandyǵynan aıyryldy.