Aqbaqaı aty atalsa, eldiń esine onyń altyndary túsedi. Al sol altyn altyn kúıinde qalaı keletinine bylaıǵy jurt onsha bas aýyrta bermeımiz. Shyndyǵynda, ol orasan zor eńbek pen bilimdi, oǵan qosa jyldar boıǵy tájirıbeni talap etedi. Jambyl oblysynyń Moıynqum aýdanynda ornalasqan áıgili «Aqbaqaı» ken ornynyń aty keshegi Keńes kezeńinde dúrkirep shyqsa, búginderi de saptyaıaqtyń syry ketse de, syny ketpeıdi degendeı, shama-sharqynsha jumys istep keledi. Aımaqtyń qıyr shetindegi Aqbaqaı kentin jergilikti halyq qatty súıedi desek artyq aıtqandyq bolmas. Oǵan sol ken ornyna sanaly ǵumyryn arnaǵan mamandardy qosyńyz. Onyń ishinde ushqan qus pen júgirgen ańdy ilýde bir kezdestiretin osy bir syrǵa toly saıyn dalada mamandyǵyn maqtanysh tutqan názik jandy arýlar da bar. Solardyń qatarynda «Altyn Almas» AQ Aqbaqaı fılıaly Altyn aıyrý fabrıkasynyń ınjener-tehnologtary Dámetken Tólegenova men Almash Degerbaeva da bar.
Qos burymdynyń bul jerde qyzmet etip kele jatqandaryna on bes jyldan astam ýaqyt bolypty. Tehnolog mamandyǵynyń joǵary bilimin alǵannan beri arýlar óz salasynda jemisti eńbek etip keledi. Bul ekeýin de saladan bóle-jara qaraı almaısyz. Ekeýi de qarapaıym jumysshy jas maman bolyp bastap, fabrıkanyń barlyq salalaryn kórgen kánigi mamandar. Mamandyqtaryn sheksiz súıgen olar ózderin ózge jumystarda elestetip te kórmegen.
«Men sanaly ǵumyrymdy óz mamandyǵyma arnasam, ol osy Aqbaqaımen tyǵyz baılanysty. Ras, alǵashynda bul jerde qıynshylyqtar kezdesti. Áli de jumys bolǵan soń aragidik shyǵyp qalady. Onyń barlyǵyna da shydam men jumysqa degen erekshe ynta kerek. Sonda ǵana isiń alǵa basyp, bereke kiredi», deıdi Dámetken apaı. Al, Almash bolsa, áriptesiniń sózine qosyp-alarym joq dep kúlimsireıdi.
Keıde aýysym saıyn, keıde táýlik boıy bastarynan kaska túspeıtin názik jandar únemi qyzý jumysta júredi. Oblys nemese aýdan ortalyqtarynan yntalansa osynshama jyldyq mol tájirıbemen jaıly jumys taýyp alatyndaryna biz senimdi bolsaq ta, olar ony tipti oılaryna da alyp kórmegen. Osy bir qıyndyǵy men qyzyǵy qatar júrgen qaýyrt jumystaryn ózgesine áste de aıyrbastamaıdy. Ony mamandardyń mamandyqtaryna degen ár jyly sózderinen ańǵarǵandaımyz.
Altyndy kennen aıyrýda ınjener-tehnologtardyń atqarar jumystary aýqymdy. Salanyń san-salaly mamandary jumyla kótergen júktiń bir shetin ustaýda keıipkerlerimiz sekildi ınjener-tehnologtar eńbekteri ushan-teńiz. О́zderin fabrıkaǵa kirpish bolyp qalanǵandaryn baqytqa balaıtyndyqtary da osydan shyǵar olardyń.
Jumystaryn asa bir yjdaǵattylyqpen berile jasap júrgen jandardy kórgende baqyttyń eń úlkeni de osy ma dersiń. Otbasynda aıaýly jar, ardaqty ana bolyp, ul-qyz tárbıelep otyrǵan qos ananyń mamandyǵynan bereke taýyp otyrǵany keıingi býynǵa úlgi-ónege. Bizdegi oı da osyǵan saıady.
Ábdirahman QYDYRBEK,
«Egemen Qazaqstan».
Jambyl oblysy.