Tobyl óńirinde sońǵy on shaqty jyldyń ishinde erekshe qajettilikke ıe jandarǵa arnalǵan sport jarystary men týrnırler jıi ótip júr. Oblysta múmkindigi shekteýliler sporty da jyl sanap damyp keledi. Atalǵan salada túrli máseleler de boı kórsetip qalady, biraq birtindep sheshimin taýyp jatyr.
«Úmit-Nadejda» qoǵamdyq qorynyń tóraǵasy Dúısenǵalı Ospanovtyń bastamasymen 2015 jyly oblystyq «Múgedekter sport klýby» qurylǵan. Atalǵan mekeme sodan beri yntaly múmkindigi shekteýli jandardyń ózderi qalaǵan sport túrlerimen shuǵyldanýyna jaǵdaı týǵyzyp, orynjaı jáne sport qurylǵylarymen qamtamasyz etý, túrli deńgeıdegi jarystarǵa aparý, issapar qarajatyn tabý sııaqty máselelerdi retteýmen aınalysyp keledi.
Búginde klýbqa múshe 214 sportshynyń 167-i – Qostanaı qalasynda, Rýdnyıda – 18, Lısakov qalasynda – 24, Arqalyqta 5 adam jazǵy jáne qysqy sport túrlerimen kásibı túrde aınalysady. D.Ospanovtyń aıtýynsha, oblystaǵy erekshe qajettiligi bar jandar uzyn sany 17 sport túrimen shuǵyldanady. Onyń ishinde júzý, ústel tennısi, voleıbol, shańǵymen syrǵanaý, paýerlıftıng, jeńil atletıka, taekvondo, dzıýdo sekildi on shaqty paralımpıadalyq sport túrleri bar. Buǵan arba bıi úıirmesi men erkin kúres, mını-fýtbol, shahmat syndy sýrdlımpııalyq sport túrlerin qosyńyz.
Qostanaılyqtardyń, ásirese, paýerlıftıngke degen qyzyǵýshylyǵy artyp keledi. Paralımpııa oıyndaryna kiretin bul sport túrimen búginde jıyrmadan astam zaǵıp aınalysady. Solardyń biri – Anar Ahanova. Talaı halyqaralyq jarystarǵa qatysyp, el namysyn qorǵap júrgen Anar bes jyl ishinde halyqaralyq sport sheberi atandy.
– Qazir balalar men jasóspirimderge arnalǵan birinshi mektepte jattyǵý jasap júrmin. Sportqa osydan bes jyl buryn keldim. Ol kezde turmystyq qyzmet kórsetý kolledjinde oqıtynmyn. Alǵashqyda jaı áýesqoılyqpen kele salǵanmyn, sportpen kásibı túrde aınalysamyn degen oı múlde bolǵan joq. Alǵashqy jattyǵýlarda qatty qınaldym. Bos temir beldemeniń ózin kótere almaıtynmyn. Tipti paýerlıftıngti tastap ketkim de kelgen kezderim boldy. Alaıda ár nársege tózim kerek ekenin, onsyz eshteme shyqpaıtynyn bilgendikten, alǵashqy qıyndyqtardyń bárine shydap baqtym. Eńbegim esh ketken joq, birtindep jarystarǵa qatysyp, jaqsy kórsetkishterge qol jetkize bastadym, – dedi tájirıbeli sportshy.
Parapaýerlıftıng boıynsha Qostanaı oblysynyń aǵa jattyqtyrýshysy Dmıtrıı Sarenkonyń sózine qaraǵanda, jattyǵýǵa jańa kelip jatqan zaǵıp jandardyń sportqa degen umtylysy erekshe.
– Sport zalǵa bes jyl buryn kelgen balalardyń kóbi osydan birdeme shyǵaramyn-aý degen senim bolmaıtyn. Senim eńbek etý arqyly birte-birte qalyptasady. Qazir solardyń kóbiniń sport sheberi degen dárejesi bar. Omyrtqasy, býyny nemese bulshyq etteri zaqymdanyp ózdiginen júre almaı qalǵan balalardyń birazy úılerinde otyr. Olarǵa sportpen shuǵyldaný qajet. Eń bastysy, táýekelge bel býyp, zalǵa kelip, aqyryndap sportpen aınalysa bastaý kerek. Bizdiń komandamyz óte uıymshyl, zalǵa kelgen kez kelgen adamǵa qoldaý kórsetýge ázir turady, – dedi D.Sarenko.
«Múgedekter sport klýby» basshysynyń orynbasary Grıgorıı Zıberovtiń aıtýynsha, sport jattyǵýlary múmkindigi shekteýli jandardyń fýnksıonaldyq múmkindikterin keńeıtip, densaýlyǵyn jaqsartady, tipti sportta joǵarǵy jetistikterge jeteleıdi. Atalǵan klýb búginde kemtarlardy sportqa meılinshe kóptep tartý arqyly iri halyqaralyq jarystarda joǵary kórsetkishterge qol jetkize alatyn kásibı sportshylardy daıarlaýdy kózdep otyr. Alaıda klýbtyń basty maqsaty – erekshe qajettiligi bar azamattardyń qoǵamǵa beıimdelýine jaǵdaı jasaý.
Sońǵy alty jylǵa kóz júgirtip kórsek, Qostanaı oblysynyń erekshe sportshylary respýblıkalyq jáne halyqaralyq jarystarda jıi jeńis tuǵyrynan kórinip júr. Al Aleksandr Kolıadın – 2018 jylǵy paralımpııa chempıony. Mundaı tabysqa jetýge osy zalǵa kelip júrgen kez kelgen sportshynyń múmkindigi bar deıdi jattyqtyrýshylar.
Qostanaı oblysy