Qazaqstandyqtar magıstratýraǵa túsý úshin jeti myńǵa jýyq ótinish berdi, dep habarlaıdy Egemen.kz Bilim jáne ǵylym mınıstrliginiń baspasóz qyzmetine silteme jasap.
Magıstratýraǵa ekinshi qabyldaý qorytyndysy boıynsha 6 778 ótinish tústi. Doktorantýrada oqý úshin 700-den astam ótinish berildi.
«Buǵan deıin QR BǴM endi nıet bildirýshiler jylyna eki ret magıstratýra men doktorantýraǵa qujattar tapsyra alady degen sheshim qabyldaǵan bolatyn. Bul jańalyq qandaı da bir sebeptermen qujattardy dástúrli alǵashqy qabyldaý kezinde ótinim berýge múmkindigi bolmaǵan myńdaǵan qazaqstandyqtardy qýantty. Endi testti sátti tapsyrǵan úmitkerler jazǵy qabyldaý qorytyndysy boıynsha taǵaıyndalmaı qalǵan granttardy utyp ala alady», dep atap ótti Bilim jáne ǵylym vıse-mınıstri Qýanysh Erǵalıev.
Aıta ketsek, magıstratýraǵa keshendi testileý jáne doktorantýraǵa túsý emtıhandary 2-11 jeltoqsan aralyǵynda ótkiziledi.
TOEFL ITP testiniń nátıjelerimen doktorantýraǵa túsýshiler aǵylshyn tilin bilýge arnalǵan qosymsha testileýden ótedi. Ol túsý emtıhanyn tapsyrǵanǵa deıin ótkiziledi. Test tapsyrmalarynyń jalpy sany 100 suraqtan turady. Aǵylshyn tilin bilýge arnalǵan qosymsha testileý «ruqsat berý» nemese «jibermeý» nysanynda baǵalanady. «Ruqsat» baǵasyn alý úshin keminde 75 ball jınaý qajet. Aǵylshyn tilin bilýge arnalǵan testileý, keshendi testileý jáne túsý emtıhandary óńirlik testileý ortalyqtarynda ótkiziledi.
Bilim berý granttaryn taǵaıyndaý konkýrsyna qatysý úshin qujattar 2021 jylǵy 25 jeltoqsanǵa deıin qabyldanady. Bul rette magıstratýraǵa jáne doktorantýraǵa qysqy qabyldaý 2021 jylǵy 2-11 jeltoqsan aralyǵynda ótkizilgen testileý jáne túsý emtıhandarynyń nátıjeleri boıynsha júzege asyrylatyn bolady.
Magıstratýra men doktorantýraǵa qabyldaý 2021 jyldyń 26 jeltoqsany men 2022 jyldyń 10 qańtary aralyǵynda ótedi.