«Sýdyń da suraýy bar» deıdi atam qazaq. Osy sózden keıin-aq onyń mańyzynyń qanshalyqty ekenin aıtyp jatýdyń ózi de artyq pa dersiń. Al osy aýyz sý máselesiniń sheshimderi elimiz aımaqtarynda búginde qanshalyqty júzege asyrylýda? Mine, osy maqsatpen «Qazaqstan temir joly» UK» AQ basshylyǵy júzege asyryp jatqan «Móldir bulaq» baǵdarlamasy qanshalyqty ómirsheń, aýyzsý sapasy qandaı dárejede ekendigin bilý turǵysynda qurylǵan arnaıy tekserý toby Pavlodar mańyndaǵy stansalarda bolyp qaıtty. Top quramynda Densaýlyq saqtaý mınıstrligi Memlekettik sanıtarlyq-epıdemıologııalyq komıtettiń ókili Raıhan Omarova, Pavlodar temirjol bólimshesiniń Sanıtarlyq-epıdemıologııalyq basqarmasynyń bastyǵy Qanatbek Beısebaev jáne «Temirjolsý-Arys» JShS-niń dırektory Ásemhan Ámirhanov bar.
«Qazaqstan temir joly» UK» AQ-ta 2012-2016 jyldarǵa arnalǵan «Móldir bulaq» baǵdarlamasy qolǵa alyndy. Osy baǵdarlama aıasynda ulttyq kompanııaǵa enshiles barlyq stansalar men razezderdi qajetti mólsherde sapaly sýmen qamtamasyz etý kerek bolatyn. Búgingi tańda «Móldir bulaq» baǵdarlamasy boıynsha 2012-2013 jylǵa josparlanǵan ınvestısııalyq jobalar júz paıyzǵa oryndalǵan. Osy aýqymdy jobany atqarýdy óz moıyndaryna alǵan «Temirjolsý» AQ eki jyl kóleminde 238 temirjol stansalary men razezderdegi 314 nysandy sapaly sýmen qamtamasyz etip qana qoımaı, káriz júıelerin qaıta jańartyp, tolyq kúrdeli jóndeý jumystaryn júrgizgen.
– «Móldir bulaq» baǵdarlamasy boıynsha bizdiń oblysta atqarylyp jatqan jumystardy kózimizben kórdik. Baıqasaq, baǵdarlama aıasynda birqatar sharalar jasalǵan. Ásirese, maǵan taza sýdyń talapqa saı sapaly bolǵany basty nazar aýdartty. Biz jylyna bir ret jospar boıynsha barlyq stansadaǵy sýdyń sapasyn tekserip, qadaǵalaý jumystaryn júrgizemiz. Eger, aýyzsý sanıtarlyq talapqa saı bolmasa bir adam emes, barlyq aýyl turǵyndary aýyryp qalýy múmkin. Sondyqtan aýyzsýdyń sapasyna qoıar talap óte joǵary bolmaq, – deıdi Pavlodar temirjol bólimshesi sanıtarlyq-epıdemıologııalyq basqarmasynyń bastyǵy Qanatbek Beısebaev.
Shahardyń irgesinde syldyraı aqqan Ertis ózeninde Ońtústik jáne Soltústik sý qoımasy ornalasqan. Ońtústik sý qoımasy qala turǵyndaryn taza sýmen qamtamasyz etse, soltústik sý qoımasynda óndiriske jumsalǵan qaldyq sýlar saqtalǵan. Osy qaldyq sý arnaıy apparattarmen tazartylyp sý sorǵysh stansasyndaǵy úlken ydystarǵa quıylady. Ol ydystarda arnaıy súzgish ornatylǵan. Sol súzgishten ótken sý sanıtarlyq talapqa saı jasalyp, sý aıdaǵysh munaraǵa barady. Bul sýdyń sapalylyǵy ár saǵat saıyn tekserilip otyrady. Sýdaǵy kezdesetin túrli bakterııalardy óltiretin arnaıy qurylǵylar múltiksiz jumys isteıdi.
«Temirjolsý» AQ prezıdenti Qýat Esimhanov «Temirjolsý-Pavlodar» JShS-niń ujymymen keńeıtilgen jıyn ótkizip, onda ótken jyly jasalǵan jumystarǵa baǵa berip, aldaǵy tańda atqarylatyn sharalarǵa toqtaldy.
«Bizdiń búgingi reıdke shyqqandaǵy maqsatymyz «Móldir bulaq» baǵdarlamasynyń eki jyl kólemindegi atqarylǵan jumystaryna saraptama jasap, kózben kórý bolatyn. Alǵashqy tekserý sharasy Almaty oblysynda bastalyp, endi mine, Kerekýde jalǵasyn tapty. Pavlodar oblysynda baǵdarlama aıasynda kóp jumystar atqaryldy. «Móldir bulaq» baǵdarlamasy boıynsha 2012-2013 jyldarǵa arnalǵan 2 mlrd. 745 myń teńge qarjy tolyq ıgerildi. Al, «Temirjolsý-Pavlodar» JShS osy jyldary júrgizgen kúrdeli jóndeý jumystaryna 270 mln. teńge qarjy ıgergen. Degenmen, alda atqarylar jumys óte kóp. Bıyl elimiz boıynsha 56 stansa men beketterge kúrdeli jóndeý jumystaryn júrgizemiz. 2015 jyly KTJ-nyń balansyndaǵy barlyq 544 stansa men razezderge aýyzsý jetkizýdi aıaqtaýdy mejelep otyrmyz», deıdi Qýat Esimhanuly.
Ábdirahman QYDYRBEK,
«Egemen Qazaqstan».