Elordada er adam shirkeýde urlyq jasady degen kúdikpen ustaldy. Bul jaıynda Nur-Sultan qalalyq polısııa departamentinen málim etti, dep habarlaıdy Egemen.kz.
«Jedel is-sharalar júrgizý barysynda Nur-Sultan qalasy shirkeýleriniń birinen urlyq jasady degen kúdikpen 33 jastaǵy er adam ustaldy. Atalǵan urlyq faktisi jaıly polısııaǵa shirkeýdiń qyzmetkeri habar bergen», delingen departament málimetinde.
Vedomstvo aqparatyna qaraǵanda, kúdikti saǵat 13:00 shamasynda dosymen birge Kúıshi Dına kóshesinde ornalasqan shirkeýge jylyný syltaýymen kirgen. Sodan ústeldiń ústinde turǵan «Samsýng» markaly uıaly telefondy eshkimge baıqatpaı urlap ketken. Keltirilgen shyǵyn kólemi 60 myń teńgeni quraıdy.
«Ury dál sol kúni turǵylyqty jerinde ustalyp, qylmysyn moıyndady. Kúdiktige qatysty sotqa deıingi tergeý júrgizilip jatyr. Onyń elorda aýmaǵynda osyǵan uqsas buryn jasalǵan qylmystarǵa qatysy bar-joǵy tekserilýde», dep atap ótti departamentten.
Buǵan deıin elordadaǵy Serafım ǵımabadathanasynyń burynǵy kúzetshisi sybaılasymen birge qaıyrymdylyq jáshikterin urlap ketkeni týraly habarlanǵan bolatyn.